महानगरया धू अप्पा दयेकीगु उद्योगात बीगु
येँ – येँ महानगरपालिकां महानगरया सतकं संकलन जूगु धुलं अप्पा दयेके बीगु जूगु दु । येँ मनपां महानगरया सतकं संकलन याःगु धू दक्वं आः अप्पा उत्पादन याइगु उद्योगयात अप्पा दयेकेत बीत्यंगु खः । येँ मनपां ब्रुमरपाखें संकलन जूगु दक्वं धू अप्पा दयेकीगु उद्योगयात बीगु योजना हःगु खः ।
महानगरपालिकां न्हियान्हिथं महानगरया सतकय् ब्रुमर संचालन यानाः धू संकलन यायेगु ज्या न्ह्याका वयाच्वंगु दु । ब्रुमरपाखें संकलन जूगु धू आतक सतकया गाः ल्हाकेत व पार्क, मैदान आदि निर्माणया ज्याय् छ्यला वयाच्वंगु खःसा आवंलिं उकथं संकलन जूगु धू अप्पा दयेकीगु उद्योगयात बीत्यंगु खः ।
येँ मनपां ब्रुमरपाखें न्हियान्हिथं संकलन याःगु धू सदुपयोग यायेगु उद्देश्यं अप्पा उत्पादन याइगु उद्योगयात बीगु योजना न्ह्यःने हःगु खः ।
येँ मनपा थम्हं हे न्याःगु न्यागः व अनुदानपाखें प्राप्त निगः यानाः न्हय्गः ब्रुमरं महानगरया थीथी सतकय् च्वंगु धू मुनेगु ज्या न्ह्याका वयाच्वंगु दु ।
थुपिं ब्रुमरं बहनिसिया १० ताःइलंनिसें सुथसिया ४ ताःईतक धू मुनेगु यानाच्वंगु दु । महानगरं न्हय्गः हे बु्रमर संचालन यानाः न्हिं च्यागू टन स्वयां अप्वः धू संकलन याना वयाच्वंगु दुसा थुकथं संकलन जूगु धू मेमेगु धुलय् ल्वाकछ्यायेगु यानाच्वंगु मदु ।
येँ मनपाया प्रवक्ता ईश्वरमान डंगोलं धयादिल, ‘गाः ल्हाकेत व पार्क लगायतया संरचना निर्माण यायेत मनपायात न्हियान्हिथं ब्रुमरपाखें संकलन जूगु धू म्वाः, उकिं अज्याःगु धू अप्पा दयेकेत उपयुक्त जुइगुलिं अप्पा दयेकीगु उद्योगयात बीगु योजना हयागु खः ।’
सतकय् धू मदयेकाछ्वयेगु व छेँखा छेँखां पिहां वइगु फोहरयात नं सतकय् तक वयेके मबीगु योजना दयेकाच्वंगु जानकारी बियादिसें वय्कलं धयादिल, ‘फोहरयात गुलि फु उलि सदुपयोग यानाः म्हो परिमाणया ल्याखय जक फोहरयात डम्पिङ यायेगु योजना नं दयेकाच्वनागु दु ।’
महानगरं फोहरया कर्मचारी म्हो यायेगु योजना नं दयेकाच्वंगु धासें वय्कलं ब्रुमरं सतकया धू सफा याइगु जक मखसे धू मुनेगु ज्यातकं याना वयाच्वंगु जानकारी बियादिल ।
LEAVE YOUR COMMENTS