वन्दे त्वाःया फल्चा उलेज्या

येँ- येँ महानगरपालिका वडा नं. १२ वन्दे त्वालय् च्वंगु फल्चाया उलेज्या याःगु दु । येँ महानगरपालिकाया प्रमुख विद्यासुन्दर शाक्यं वन्दे फल्चाया उलेज्या यानादीगु खः ।

फल्चा उलेज्या लिपा येँ महानगर प्रमुख शाक्यं थःपिंथाय् माग जुया वःगु व विवाद मदुगु सम्पदात पुनःनिर्माण व मर्मत यायेगु ज्यायात कार्यान्वयन याना यंका च्वनागु प्रतिक्रिया बियादीगु दु । प्रमुख शाक्यं धयादिल, ‘माग जुया वःगु व विवादरहित सम्पदा दक्वं पुनःनिर्माण व मर्मत सम्पन्न यायेगु नापं उकिया संरक्षण, संवद्र्धन, संचालन व व्यवस्थापनया निंतिं स्थानीय समुदाययात हस्तान्तरण यायेगु ज्या नं जुया वयाच्वंगु दु ।’

झी पुर्खा दयेकातःगु सम्पदा न्हापांनिसें स्थानीय समुदायं संरक्षण याना वयाच्वंगु खःसा आः वयाः राज्यया नं सहभागिता दयेमा धइगु ल्याखं थःपिंसं अज्याःगु सम्पदा व भौतिक संरचना निर्माणयात कार्यान्वयनय् यंकाच्वनागु वय्कलं धयादिल । सम्पदा संरक्षण व उकिया मर्मतया निंतिं यायेमाःगु छुं नं कथंया योजना दुसा धुक्क जुयाः वयेत इनाप यासें वय्कलं धयादिल, ‘पुनःनिर्माण व मर्मत यानाः उकिया संरक्षण व उपभोगया निंतिं स्थानीय समुदायययात हे जिम्मा बीगु जुइ ।’

महानगर उपप्रमुख हरिप्रभा खड्गी श्रेष्ठं येँ देय्या म्हसीका धइगु हे थनया मूर्त अमूत सम्पदा जूगु व थुकिया संरक्षणया निंतिं लगानी यायेत थःपिं लिचिलेगु जुइ मखु धयादिल ।

वडाअध्यक्ष विकास डंगोलं फल्चाया संरचना स्वयेबलय् चीधं जूसां थ्व धार्मिक व सामाजिक उपयोगिताया दृष्टिकोणं अतिकं महत्वपूर्ण जू धासें फल्चाय् त्वाःबहाःया ज्याथःपिं वयाः दुःखसुखया खँ ब्याकेगु याइगुलिं आः हाकनं अज्याःगु गतिविधिं निरन्तरता काइगु विश्वास प्वंकादिल ।

सम्बन्धित बुखँ

LEAVE YOUR COMMENTS