लुँ तस्करी छानबिन समितिया मस्यौदा तयार

येँ (नेपालभाषा टाइम्स)÷ लुँ तस्करीया छानबिन यायेत दयेकीगु उच्चस्तरीय समितिया प्रारम्भिक मस्यौदा तयार जूगु दु । म्हिगः सिंहदरबारय् च्वंगु स्वंगू दलया नेतात दुथ्याःगु कार्यदलं उच्चस्तरीय छानविन समितिया मस्यौदा तयार याःगु खः ।

प्रधानमन्त्री पुष्पकमल दाहालं वंगु सोमवाः सःतूगु सर्वदलीय बैठकय् सरकार लुँ तस्करी प्रकरणया छानविनया नितिं उच्चस्तरीय समिति दयेकेत सहमत जुइवं एमाले उपाध्यक्ष सुवास नेम्वाङ, कांग्रेस प्रमुख सचेतक रमेश लेखक व माओवादी केन्द्रया प्रमुख सचेतक हितराज पाण्डे दुगु कार्यदलयात मस्यौदा तयार यायेगु जिम्मा बिउगु खः ।

प्रमुख प्रतिपक्षी एमालें लुँ तस्करी छानविनया नितिं उच्चस्तरीय समिति गठन यायेमाःगु माग यासें वंगु साउन १० गतेनिसें संसदया बैठकय् पंगः थना वयाच्वंगु खः । सोमवाःया बैठकय् सत्तापक्ष समिति दयेकेत सहमत जुइवं मस्यौदा तयार यायेगु कार्यदल गठन याःगु खः ।

म्हिगः हे च्वनीगु सर्वदलीय बैठकं मस्यौदायात कयाः सहलह यानाः समितिया कार्यादेश व संरचना क्वःछीवं संसदया बैठक न्ह्याकेगु तयारी याःगु खः । तर म्हिगः सर्वदलीय बैठक च्वने मफयेवं मस्यौदायात कयाः सहलह जुइ मफुत । म्हिगः एमाले अध्यक्ष केपी शर्मा ओली म्हं मफयेवं सर्वदलीय बैठक स्थगित जूगु खः ।

आः हाकनं च्वनीगु सर्वदलीय बैठकय् मस्यौदायात कयाः सहलह यायेगु व उच्चस्तरीय समितिया कार्यादेश क्वःछीगु खँ धाःगु दु । म्हिगः सर्वदलीय बैठक च्वने मफयेवं संसदया बैठक नं स्थगित जूगु दु ।

लुँ तस्करीया अनुसन्धान सीआईबीपाखें याइसा निष्कर्षय् थ्यनेधुंकाः अभियोजन अनुसन्धान क्वचायेधुंकाः जक प्रक्रिया न्ह्याकी । वयां लिपा जक समग्र विषययात कयाः आयोगं अध्ययन याइगु खँ धाःगु दु । थ्व अनुसन्धान आः सीआईबीं हे यानाच्वंगु दु ।