कन्या मन्दिरय् ससुद्यः थापना

येँ(नेपालभाषा टाइम्स)- थनया न्ह्यःखाय् च्वंगु कन्या मन्दिर उच्च माध्यमिक विद्यालयय् ससुद्यः थापना याःगु दु । ब्वनेकुथिया पुलांपिं विद्यार्थीतय् संस्था कन्या मन्दिर अल्मनि एशोसियसनपाखें ब्वनेकुथिया प्रांगणय् देगः दयेकाः ससुद्यः थापना याःगु खः ।

मुक्कं मिसातय्सं जक अध्ययन याइगु ब्वनेकुथि ७५ दँ क्यंगु हीरक जयन्तीया लसताय् एसोसियसनया स्थापनाकालनिसें आतकया कार्यकारिणी समितिइ च्वनाः ज्या यायेधुंकूपिं इच्छुक विद्यार्थीपाखें ल्हापं म्हयाः ससुद्यः थापना याःगु खः ।

वंगु माघ १ गते विधिवत रुपं जल आसन, २ गते, धान आसन ३ गते वस्त्र आशन यानाःलि ४ गते होम, पुजा अर्चनालिसें विधिवत प्राण प्रतिस्था नं याःगु खः । ब्वनेकुथिया पुलांम्ह विद्यार्थी देवलक्ष्मी श्रेष्ठ प्रधानया संयोजकत्वय् द्यः पलिस्था यानाः पुजा याःगु खः ।

थ्व हे झ्वलय् अल्मनि एशोसियसनपाखें वइगु माघ १२ श्रीपंचमिया दिनय् ब्वनेकुथिया सकल पुलांपिं ब्वँमिपिंत ब्वनाः तःजिक ससुपुजा यायेगु ग्वसाः ग्वयातःगु दु ।