चीन भ्रमण सफल – प्रधानमन्त्री
येँ – प्रधानमन्त्री केपी ओलीं थःगु चीन भ्रमणं पारवहन व यातायात क्षेत्रय् नेपाःया दायरा तब्या जूगु खँ धयादीगु दु । चीनया खुन्हुयंकंया औपचारिक भ्रमण पूवंका स्वदेश लिहां वयेवं त्रिभुवन अन्तर्राष्ट्रिय विमानस्थल पत्रकारत लिसे खँ ल्हासें वय्कलं धयादीगु दु, ‘नेपाल–चीन दथुइ मित्रता व सद्भाव अप्वयेकेगु व निगू देय् दथुइ न्हापा जुयाच्वंगु सम्झौता व समझदारी कार्यान्वयनया प्रक्रिया व ढाँचा तयार यायेत भ्रमण सफल जूगु दु ।’
वय्कलं धयादिल, ‘उच्चस्तरीय भ्रमणया आदानप्रदान पाखें आःया स्वापू विस्तार व थप मजबूत यायेत निगुलिं देय् सहमत जूगु दु । राष्ट्रपतिया पाखें महामहिम चिनियाँ राष्ट्रपति व चिनियाँ प्रधानमन्त्रीयात नेपाः भ्रमणया निंतिं ब्वनापौ बियागु दु । चीनया उच्च राजनीतिक नेतृत्वपाखें याकनं हे नेपाः भ्रमण जुइगु आशा यानागु दु ।’भ्रमणया झ्वलय् ऊर्जा ग्वाहालि, मितेरी ताँ व रसुवाया ताँ पुनःनिर्माण सम्बन्धी निगू बिस्कं बिस्कं सम्झौता जूगु, सामान ढुवानीया निंतिं चीनया तिब्बती राजमार्गया उपयोग यायेगु सम्बन्धी प्रोटोकलय् हस्ताक्षर जूगु जानकारी बियादिसें प्रधानमन्त्री ओलीं लगानी व उत्पादन क्षमता सहयोग सम्बन्धी समझदारीपत्र, नेपाल चीन सहयोग अन्तर्गतया ज्याझ्वः व परियोजनाया कार्यान्वयनय् सहजीकरणया निंतिं संयन्त्र स्थापना यायेगु सम्बन्धी निगू देय्या समझदारीपत्रय् हस्ताक्षर जूगु खँ नं कनादिल ।
अथेहे निगू देय्या परराष्ट्र मन्त्रालय दथुइ ग्वाहालि सुदृढीकरण, मानव संशाधनय् ग्वाहालि व आर्थिक व प्राविधिक ग्वाहालिया सम्झौता नं जूगु दु । सम्झौता बारे वय्कलं धयादिल, ‘थ्व सम्झौता कथं चीनं नेपाःयात स्वंगू अर्ब चिनियाँ युआन ग्वाहालि यायेगु खँ नं दुथ्याः । चीनं थ्वयां न्ह्यः घोषणा यानातःगु प्रतिबद्धता कथं थप छगू अर्ब युआन नं ग्वाहालि वइ ।’
प्रधानमन्त्री ओलीं नुवाकोट दरवार व रसुवा, दोलखा व सिन्धुपाल्चोकय् भुखाचं दुंगु स्कुल पुनःनिर्माण यायेगु सम्झौता नं जूगु खँ न्हयथनादिसें तराईया खुसि नियन्त्रण यायेगु योजना अन्तर्गत झापाया थीथी जिल्लाय् गुपु खुसिइ नियन्त्रण यायेगु सम्बन्धी समझदारीपत्रय् नं हस्ताक्षर जूगु खँ कनादिल । अथेहे नेपाः व चीनया सार्वजनिक निजी क्षेत्रया व्यवसायी दथुइ जलविद्युत व उत्पादन लगायत थीथी गुंगू सम्झौता जूगु खँ न्हयथनादिसें वय्कलं थ्व सम्झौतापाखें तःधंगु ल्याखय् चिनियाँ लगानी दुहां वइगु आशा प्वंकादिल । नेपाः व चीन दथुइ जुयाच्वंगु एक क्षेत्र एक मार्ग सम्बन्धी समझदारीया कार्यान्वयन यायेत रेलमार्ग, बन्दरगाह, हवाई मार्ग व संचार थेंज्याःगु क्षेत्रय् ग्वाहालि न्ह्याकेगु निंतिं नं सहमति जूगु खँ कनादिसें वय्कलं आः जूगु सम्झौता व समझदारीं निगू देय् दथुइ आर्थिक ग्वाहालिया दायरा तब्या यायेत ग्वाहालि जुइगु विश्वास प्वंकादिल ।
वय्कलं केरुङ–रसुवागढी–येँ रेलमार्ग विकासया निंतिं चिनियाँ अनुदानय् पूर्व सम्भाव्यता अध्ययन याकनं हे क्वचायेकाः सहयोग सम्बन्धी ज्या न्ह्याः वनीगु खँ कनादिसें थ्व धुंकाः येँ–पोखरा– लुमिबनी रेलमार्ग दयेके नं आधार तयार याइगु विश्वास प्वंकादीगु दु । प्रधानमन्त्री ओलीं रसुवागढी–केरुङ नाकायात व्यवस्थित यायेगु, स्याफ्रुबेसी–रसुवागढी सडक सुधार व हिल्साय् ताँ दयेकेगु निंतिं निगुलिं पक्ष सहमत जूगु खँ न्हयथँसें नेपालय् चिकं व ग्यास अन्वेषण अध्ययन यायेत नं ग्वाहालि जुइगु व पेट्रोलियम पदार्थ भण्डारया निंतिं माःगु पूर्वाधार दयेकेत नं ग्वाहालि बीत चीन सहमत जूगु खँ नं कनादीगु दु ।
LEAVE YOUR COMMENTS