नाका बन्द यायेगु भारतीय किसानतय् ख्याच्वः

येँ- नेपालगञ्जया सीमावर्ती भारतीय जनतां नेपालगञ्जय् च्वंगु रुपैडिया नाका बन्द यायेगु ख्याच्वः बिउगु दु । भारतीय भूमिं नेपालय् दुहां वइगु दुग्ध पदार्थय् नेपाःपाखें प्रतिबन्ध तयेवं आक्रोशित जूपिं सीमावर्ती स्थानीय जनतां बाँकेया भन्सार कार्यालयया प्रमुख शान्तिराम निरौलायात ज्ञापनपौ लःल्हासें अज्याःगु ख्याच्वः बिउगु खः ।

भारतं नेपाः दुहां वयाच्वंगु दुरु गुणस्तरहीन जूगु गुनासो अप्वयेवं वंगु बिहीवाःनिसें नेपालं दुरु आयातय् कडा याःगु खः ।
नेपालं आः दुरुया परीक्षण यानाः ५ प्रतिशत भन्सार पुलेधुंकाः जक थःथाय् दुकायेगु यानाच्वंगुलिं भारतीय कृषकतय्सं न्हियान्हिथं दुरु परीक्षण याके मफइगु व भन्सार नं पुले मफइगु खँ धाःगु दु ।

मेखे नेपाःया किसानतय्सं धाःसा दुरु आयातय् कडा याःगु भन्सारया निर्णययात लसकुस याःगु दु । नेपाःया कृषकतय्सं ५ प्रतिशत भन्सारं नेपाःया उत्पादनयात प्रतिस्पर्धी दयेकेत ग्वाहालि याःगुलिं लसता प्वंकूगु दु । भारतीय कृषकतय्सं यदि थःपिनि दुरु नेपालय् दुकायेगु ज्या मयात धाःसा नाका हे बन्द यायेगु जुइ धकाः ख्याच्वः बिउगु खः ।

सम्बन्धित बुखँ

LEAVE YOUR COMMENTS