सहकारीया ठगी काण्डय् तःधंपिं न्याम्ह ज्वन

येँ -ठगीया द्वपनय् सिभिल सहकारीया झिंनिम्हेसित प्रहरीं ज्वंगु दु । नेपाल प्रहरीया केन्द्रीय अनुसन्धान ब्यूरो (सीबीआई) या कथं सहकारी ठगी याःगु द्वपनय् प्रहरी पुलांपिं कर्मचारी सहित थीथी पदय् च्वनाच्वंपिंत ज्वंगु खः ।

ज्वंपिं सिभिल सिभिल सेभिङ एण्ड क्रेडित को–अपरेटिभ लिमिटेडया पुलांम्ह अध्यक्ष इच्छाराज तामाङ, वर्तमान सञ्चालक समितिया अध्यक्ष केशवलाल श्रेष्ठ, प्रबन्धक सहजकर्ता भगवानबहादुर सिंह, जुनियर असिष्टेन्ट म्यानेजर मायोनानी महर्जन व एलिना तुलाधर खः ।

उकथं हे जुनियर अधिकृत शंकरप्रसाद पाठक, असिस्टेन्ट संगीत श्रेष्ठ, लेखा अधिकृत राकेश महर्जन, जुनियर सहायक प्रबन्धक बुद्धराज तामाङ व कौस्तुभकेतन ढुंगाना, सिभिल होम्सया वरिष्ठ प्रबन्धक विजयविक्रम शाह, पुलांम्ह लेखा समितिया दुजः हरिहर लामिछानेयात नं ज्वंगु दु ।

ज्वंपिंसं बचतया तःधंगु ब्व सहकारी ऐन, २०७४ व सहकारी नियमावली, २०७५ या प्रावधान अःखः छम्ह हे व्यक्ति संस्थापक दुगु थीथी परियोजनाय् लगानी याःगु व उकथं हे परियोजनाया संरचना मीधुंकाः वःगु ध्यबा विदेशय् छ्वयाः सम्पत्ति शुद्धीकरण कसुर याःगु आशंका नं प्रहरीं याःगु दु ।

प्रहरीया कथं उगु सहकारीं १३७ म्ह बचतकर्ताया ७० करोड ८७ लाख तका हिनामिना याःगु आशंका याःगु दु । उकथं हे मेपिं बचतयात निक्षेप व ब्याज कायेमानिगु खःसा प्रहरीयात जानकारी बीत नं इनाप याःगु दु । उकी ध्यबा लाःपिं बचतकर्तातय्सं प्रहरीइ वनाः थःपिनि ध्यबा बचे याना बी माल धकाः उजरी नं तयेधुंकूगु दु ।