सार्वजनिक खरिद ऐन संशोधन यायेत माग यासें प्रदर्शन

येँ – निर्माण व्यवसायीतय्सं सार्वजनिक खरिद च्यागूगु संशोधन नियमावली २०७८ स जूगु व्यवस्था संशोधन यायेत माग यासें म्हिगः येँ प्रदर्शन याःगु दु । नेपाल निर्माण व्यवसायी महासंघं म्हिगः माइतीघर मण्डलय् विरोध प्रदर्शन यासें निर्माण मैत्री ऐन व नियमावली दयेकेमाःगु माग याःगु खः ।

सार्वजनिक खरिद च्याक्वःगु संशोधन कथं निर्माण कम्पनीया म्याद थप मजूगुलिं देय्न्यंकं निर्माण क्षेत्र व वया लिसे सम्बन्धित व्यवसाय धरापय् लाःगु धासें उमिसं म्याद थप व बैंक क्रेडिट लाइन लगायत सार्वजनिक खरिद ऐनया छुं बुँदा संशोधन यायेमाःगु माग याःगु खः ।
ठेक्का व आयोजना दयेकेगु सवालय् व्यवसायीतय्त जक दोष क्यनाः समाचार सम्प्रेषण जुयाच्वंगु धासें व्यवसायी सञ्चार क्षेत्र प्रति नं आक्रोश प्वंकूगु दु ।

सार्वजनिक खरिद ऐन कथं सम्झौता यानाः ठेक्का काःगुलिं उगु हे सम्झौता कथं कानुनी कारवाही फयेत थःपिं तयार दुगु खँ नं व्यवसायीतय्सं धाःगु दु । व्यवसायीतय्सं माइतीघर मण्डलानिसें थापाथली त्रिपुरेश्वर जुयाः युनाइटेड वल्र्ड ट्रेड सेन्टर थ्यंकाः सभा याःगु खः । बुधवाः व बिहीवाः निन्हुयंकं न्ह्याइगु राष्ट्रिय भेलां थप आन्दोलनया ज्याझ्वः क्वःछीगु खँ धाःगु दु ।