सिधइला कंक्रिट संरचना चिइके ?

तःभुखाचं क्षति जुयाः पुनःनिर्माणया क्रमय् विवादय् लानाच्वंगु रानीपुखू हाकनं पुनःनिर्माण प्रक्रिया न्ह्याकेगु झ्वलय् अन न्हापा निर्माणया निंतिं प्रयोग जूगु कंक्रिट लगायतया संरचना छवाःया दुने चिइकीगु जूगु दु । तःभुखाय् लिपा क्षति जूगु रानीपुखू पुनःनिर्माणया क्रमय् पुरातत्व विभाग व पुनःनिर्माणया जिम्मा काःगु येँ महानगरपालिका दथुइ विवाद ब्वलनेवं रानीपुखू पुनःनिर्माण गति काये मफयाच्वंगु खः । थौंकन्हय् पुखुलिं कःघानातःगु लागा छगुलिं वाउँगुख्यःथें जुयाच्वंगु दु ।

लिपांगु इलय् रानीपुखू पुनःनिर्माणया निंतिं सरोकारवाला निकाय दथुइ जूगु छगू सम्झौताकथं अन न्हापा पुनःनिर्माणया निंतिं प्रयोग जूगु कंक्रिट चिइकेगु सहमति जूगु खः । सहमतिकथं पुनःनिर्माणया क्रमय् प्रयोग जूगु कंक्रिट छवाःया दुने चिइकीगु जूगु दु । उकिया निंतिं वंगु छुं दिं न्ह्वंनिसें हे ज्या न्ह्यानाच्वंगु खःसा आः छुं दिंया दुने कंक्रिट चिइकेगु ज्या क्वचायेकाः हाकनं पुनःनिर्माणया निंतिं बोलपत्र आह्वान याइगु जुयाच्वंगु दु । बोलपत्र आह्वान लिपा दक्वं जिम्मा निर्माण कम्पनीयात हे बीगु येँ महानगरपालिकां जानकारी बिउगु दु ।

रानीपुखू पुनःनिर्माणय् कंक्रिट प्रयोग जूगु धासें सम्पदाप्रेमीतय्सं विरोध यायेवं पुनःनिर्माणया ज्यां गति काये मफयाच्वंगु खःसा मेखे पुनःनिर्माण पुलांगु हे संरचना व आधुनिक निर्माण ज्वलं प्रयोग मयासे दयेकेमाःगु खँ पिहां वयेवं विभाग व मनपा दथुइ विवाद जुयाच्वंगु खः । थ्व झ्वलय् आः रानीपुखू तःभुखाय् ब्वये न्ह्यः गुगु संरचना व स्वरुप दुगु खः, व हे कथं पुनःनिर्माणया ज्या न्ह्याकाः क्वचायेकेगु येँ मनपाया इन्जिनियर राम थापां कनादिल ।

लिपांगु इलय् जूगु सहमतिकथं येँ मनपां रानीपुखू वंगु जेठ १५ गतेनिसें हाकनं पुनःनिर्माण न्ह्याकेगु धाःसां आतक नं ज्या न्ह्याके फयाच्वंगु धाःसा मदुनि । २०७२ सालया तःभुखाचं रानीपुखू नापं उकिया दथुइ च्वंगु बालगोपालेश्वर देगः क्षति जूगु खः । रानीपुखू पुनःनिर्माणया झ्वलय् विवाद ब्वलनेवं थ्व सम्बन्धय् राय सल्लाह कायेत येँ मनपां वंगु पुस १३ गते विज्ञ समूह गठन याः गु खः । उगु समूहं प्रतापमल्लकालीन शैलीं पुनःनिर्माण यायेमाःगु सुझाव बिउगु खः ।

मल्ल जुजु प्रताप मल्लं थः काय चक्रवर्तिन्द्र मल्ला नामं रानीपुखू दयेकेबिउगु खः । पुखू दयेकेत न्यादँया ई काःगु खःसा ने.सं. ७८९ लय् निर्माण सम्पन्न जूगु पुखुलिइ ने.सं. ७९० य् शिलापत्र तःगु खः । गुकियात ने.सं. ८११ य् न्हू पुखूया नां बिउगु खः ।

रानीपुखूया हे दथुइ च्वंगु बालगोपालेश्वर देगःया स्वरुप ग्रन्थकूट शैलीइ दयेकातःगु खः । थुकिया प्रमाण देगःया प्यखेरं च्वंगु लुखाय् तयातःगु ल्वहंतं दयेकातःगु लुखाखलुं नं पुष्टि याः। उगु खँ देगःया प्राप्त पुलांगु स्केच संरचनां नं पुष्टि जू । पुखूया प्यखेरं प्यंगः हे देगः स्थापना यानातःगु दु । उकीमध्ये उत्तर–पश्चिम कुनय् शक्तिसहितया भैरःद्यःया देगः, उत्तर–पूर्व कुनय् भैरःद्यःया देगः, दक्षिण–पूर्व कुनय् देवी व दक्षिण–पश्चिम कुनय् झिंखुका ल्हाःदुम्ह गणेद्यःया देगः थापना यानातःगु दु । पुखूया हाकनं १८० मीटर व ब्या १४० मिटर दु ।

रानीपुखू पुनःनिर्माणया ज्या शुरु यायेत वंगु चैत २२ गते संस्कृति, पर्यटन व नागरिक उड्डयन मन्त्री रवीन्द्र अधिकारी, येँ महानगरपालिकाया मेयर विद्यासुन्दर शाक्य व पुरातत्व विभगया महानिर्देशक भेषनारायण दाहाल दथुइ जूगु सहलहपाखें पुखुलिइ च्वंगु आधुनिक निर्माण सामग्री चिइकेगु निर्णय जूगु खः ।

थ्व हे झ्वलय् स्थानीयवासीन्दातय्सं रानीपुखू मल्लकालीन शैलीं हे निर्माण यायेमाःगु खँय् चिउताः क्यना वयाच्वंगु दु । वंगु वालय् जक येँ मनपाया उपप्रमुख हरिप्रभा खड्गी श्रेष्ठयात सम्पदा बचाउ अभियानय् संलग्न ल्याय्म्हतय् छगू पुचलं रानीपुखूया पुनःनिर्माण मल्लकालीन शैलीं हे ययोमाःगु धासें छगू प्रतिवेदन तकं लःल्हाःगु खः ।

उगु इलय् उपप्रमुख श्रेष्ठं रानीपुखू पुनःनिर्माणया विषयय् महानगरपालिकाय् निगू मत मदुगु व सकसिगुं ध्यान पुखूया प्राचीनता ल्यंका तयेगु निंतिं केन्द्रीत जूगु खँ धयादीगु खः ।

सम्बन्धित बुखँ

LEAVE YOUR COMMENTS