उपसभामुखयात महाभियोग तयेगु प्रस्ताव ताःमलाइगु
येँ (नेपालभाषा टाइम्स)÷नेपाली कांग्रेस व एमालें उपसभामुख इन्दिरा रानामगरयात महाअभियोग तयेगु धकाः न्ह्याकूगु कुतः ताःमलाइगु सम्भावना ब्वलंगु दु । सूत्रं धाःकथं महाअभियोगया नितिं निगू तिहाइ मत खाइगु सुनिश्चित मजुइवं कांग्रेस व एमाले लिचिलेमाःगु अवस्थाय् थ्यंगु दु ।
उपसभामुखयात चीकेगु नितिं वंगु बुधवाः हे प्रस्ताव दर्ता यायेगु तयारी याःगु खःसां मधेश केन्द्रित थीथी दलं सरकारयात समर्थन याइगु सम्भावना मदयेवं तत्काल प्रस्ताव दर्ता यायेगु ज्या लिहां वंगु खँ नं सूत्रं धाःगु दु ।
वंगु सोमवाः प्रधानमन्त्री निवास बालुवाटारय् च्वंगु सत्तारुढ दलतय् बैठकय् उपसभामुख राना मगरयात पदीय मर्यादा अःखः नेपाःस्थित अमेरिकी दूतावासय् अनधिकृत मनूतय्त अमेरिका यंकेगु नितिं अन्तर्वार्ताया मिति मिले याना बिउ धकाः पौ च्वःगु धासें चीकेगु प्रस्ताव न्ह्यःने यंकेगु सहमति जूगु खः ।
उकिया नितिं मंगलवाः व बुधवाः सुथय् तक गृहकार्य यानाः बुधवाः बहनी तक प्रस्ताव यंकेगु तयारी एमाले व कांग्रेसं याःगु खः । तर निगू तिहाइ मत खाइगु सम्भावना मदयेवं प्रस्ताव तयेगु ज्या थाति लाःगु दु ।
महाअभियोग प्रस्ताव पारित यायेत निगू तिहाइ मत माः । तर सत्ता गठबन्धनय् दुगु मधेश केन्द्रित राजनीतिक दलतय्सं आःया अवस्थाय् उपसभामुख विरुद्ध महाअभियोग तयेगु पाय्छि मजू धासें समर्थन याये मफइगु संकेत बीवं कांग्रेस व एमाले लिचिउगु खँ सूत्रं धाःगु दु ।
आःया अवस्थाय् गठबन्धनय् कांग्रेसया ८८, एमालेया ७७, जसपाया ७, लोसपाया ४ व नागरिक उन्मुक्तिया ४ यानाः मुक्कं १८० म्ह सांसद दु । निगू तिहाइया नितिं १८३ सांसद माः । मगाःपिं स्वम्ह सांसदया निंतिं सत्ता गठबन्धनं उपेन्द्र यादवया जसपा नेपाल वा सिके राउतया जनमत पार्टीया साथ कायेत स्वयाच्वंगु खः । तर थ्व निगुलिं पार्टीं उकियात सकारात्मक रुपं मकायेवं महाअभियोग प्रस्ताव थाति लाइगु सम्भावना अप्वःगु खः ।
जनमतया अध्यक्ष सिके राउतं वंगु बुधवाः हे उपसभामुख राना मगरयात सरकारं गलत नियत तयाः चीकेत्यंगु धासें उकियात कयाः असन्तुष्टि प्वंकादीगु खः । राउतं संवैधानिक परिषदय् बहुमत खाकेगु नितिं उपसभामुखयात चीकेत्यंगु द्वपं नं बियादीगु खः । उकथं हे जनमत पार्टीं थःपिं गुगुं नं हालतय् उपसभामुख चीके मजिउ धइगु पक्षय् दुगु खँ पार्टीया उपाध्यक्ष दिपक साहं कनादीगु दु ।
उकथं हे सत्ता गठबन्धनय् दुगु नागरिक उन्मुक्ति पार्टीया अध्यक्ष रञ्जिता श्रेष्ठं नं उपसभामुख विरुद्ध तइगु महाअभियोगया बारे थःपिनिगु पार्टीया आधिकारिक धारण क्वःमजिउनिगु खँ धयादीगु दु ।
LEAVE YOUR COMMENTS