सफू पितब्वज्या व हनेज्या
येँ – दी शाक्य फाउण्डेसनया ग्वसालय् जूगु छगू ज्याझ्वःया दथुइ निगू सफूया पितब्वज्या नापं थीथी ख्यलय् योगदान बियादीगु शाक्य कुलपुत्र कलुपुत्रीपिंत हनेज्या याःगु दु । फाउण्डेसनया नायः अमीरमान शाक्यया अध्यक्षताय् वंगु शनिवाः उगु ज्याझ्वः जूगु खः ।
ज्याझ्वलय् ‘बुद्ध धर्म सद्धर्मको अर्को नाउँ’ व ‘ नेवाः धाःसा’ —अंग्रेजी भासं निगू सफू पितब्वज्या याःगु खः । फाउण्डेसनया उपाध्यक्ष राजकाजी शाक्यं लसकुस यासें पितब्वज्या जूगु सफूया बारे जानकारी बियादीगु खः ।
मूपाहां कथं झायादीम्ह शिक्षा, विज्ञान व प्रविधि मन्त्री कृष्णगोपाल श्रेष्ठ, विशेष पाहां बागमति प्रदेशया सांसद राजेश शाक्य, शोभा शाक्य व फाउण्डेसनया अध्यक्ष शाक्यं मंकाःकथं सफूया पितब्वज्या यानादीगु खः ।
सफू पितब्वज्या लिपा देय्या थीथी ख्यलय् योगदान बियादीपिं शाक्य कुलपुत्र कुलपुत्रीपिंत हनेज्या याःगु खः । ज्याझ्वलय् सर्वोच्च अदालत बार एशोसियसनया अध्यक्ष पूर्णमान शाक्य, नेपाल सुनचाँदी व्यवसायी महासंघया अध्यक्ष माणिकरत्न शाक्य, लुम्बिनी विकास कोषया सदस्य सचिव सानुराजा शाक्य, नेपाल विद्युत प्राधिकरणया कार्यकारी निर्देशक हितेन्द्रदेव शाक्य, १९३ गू देय्या मुद्रा संकलन यानाः विश्व कीर्तिमन तयादीम्ह दिपेन्द्ररत्न शाक्य, एशिया प्यासिफिक शारीरिक सुगठनय् स्वर्ण पदक विजेता मल्लिका शाक्ययात मूपाहां शिक्षामन्त्री श्रेष्ठं मतिनाया चिं व हनापौ लःल्हानाः सम्मान यानादीगु खः ।
LEAVE YOUR COMMENTS