स्वनिगलय् ख्वाउँ अप्वल, माइनसं नं कुहां वनीगु

येँ – स्वनिगलय् न्हियान्हिथं ख्वाउँ अप्वया वनाच्वंगु दु । थ्व झ्वलय् वंगु सोमवाः थुगु दँया हे दकलय् अप्वः ख्वाउँगु न्हिकथं महसुस याःगु दु । मौसम पूर्वानुमान महाशाखाया कथं स्वनिगःया तापक्रम न्हियान्हिथं कुहां वनाच्वंगु व सोमवाः आतकया हे दकलय् म्हो तापक्रम मापन याःगु दु ।

स्वनिगःया तापक्रम न्हियान्हिथं कुहां वनाच्वंगु कारणं थथे हे तापक्रम कुहां वनाच्वन धाःसा वइगु छुं दिंया दुने स्वनिगःया तापक्रम माइनसं नं कुहां वये फइगु अनुमन महाशाखां याःगु दु । वइगु छुं दिंया दुने तराई क्षेत्रय् तसकं साल्लुक खसु कुहां वये फइगु अनुमान नं महाशाखां याःगु दु ।

पहाडी क्षेत्रय् धाःसा ताःईतक वा मवयाच्वंगुलिं ख्वातुक खसु खने दयाः दृश्यताय् नं कमजोर जुयाच्वंगु महाशाखां न्ह्यथंगु दु । थुगु वालय् आतकया दुने स्वनिगलय् दकलय् म्हो तापक्रम ४ दशलव ८ डिग्री सेल्सियस तक थ्यंगु दु ।