मरु सतःया गजू लसकुस यानाः दुकाल

येँ – थनया मरु त्वालय् पुनर्निर्माण जुयाच्वंगु ऐतिहासिक मरु सतःया गजू छुइगु लागिं तयारी शुरु जूगु दु । म्हिगः गजूयात मरु सतः दुने लसकुस यानाः दुकायेगु ज्या जूगु खः। आः छुं न्हि लिपा सतःया पलिइ गजू छुइगु खँ पुननिर्माण समितिया नायः सांसद राजेश शाक्यं कनादिल ।

म्हिगः लसकुस यानाः दुकाःगु गजू सिँयागु खः । सिँयागु न्हय्चाःयात छथासं पँचिनाः गजू आकार वयेकातःगु खः । नायः शाक्यया कथं मरु सतःया मू गजू धयागु थ्वहे खः । थुकियात आः पिनें सिजःया पातां मोडे यानाः तया बिल कि झीसं खनी थेंज्याःगु गजू थें च्वनी ।

म्हिगः लसकुस यानाः मरु सतलय् हये न्ह्यः थ्व गजूयात सिँख्वःमू बहाः दुने निन्हु तक तान्त्रिक विधिं पूजा याःगु खः । म्हिगः सिँख्वःमू बहाःनिसें गर्जुया पल्टन न्ह्यः न्ह्यः तयाः नेपाली सेनाया जवानतय्त कुबिकाः मरु सतः दुने तये यंकूगु खः । गजूया क्वय् धाःसा बासा लाया यंकूगु खः ।

मरु सतः दुने यंके न्ह्यः गजूयात मरु सतः लिसें नापसं च्वंगु सिँल्यं सतः तकं चाःहीकूगु खः । मरु सतलय् दिके धुंकाः नं सिँख्वःमू बहाःया गुर्जुपिंसं तान्त्रिक विधिं चचा हालाः गजूया पुजा याःगु खः ।

मरु सतःया पुनर्निर्माण ज्या आः निलाया दुने सम्पन्न यायेगु ताः तयागु खँ समितिया नायः राजेश शाक्यं कनादिल । आः तक मरु सतः परम्परागत विधिं हे दयेकेगु ज्या जुयाच्वंगु खःसा थ्व गजू च्वय् थत यंकेगु ज्या नं छुं मेसिन मछ्यसे कुबियाः हे यंकीगु खँ धाःगु दु ।