रथजात्रा च्वखँ कासाया सिरपाः इन

येँ – नेवाः बस्ती नेवाः स्कुल अभियानया ग्वसालय् जूगु जनबहाः द्यः व बुंगद्यःया रथजात्रा सम्बन्धी च्वसु च्वज्या कासाय् ताःलाःपिंत छगू ज्याझ्वःया दथुइ सिरपाः लःल्हाःगु दु ।अभियानया संयोजक दीपक तुलाधरया सभापतित्वय् जूगु ज्याझ्वलय् मिस नेवाः आइकन–११३८ दिया श्रेष्ठ मूपाहांकथं झायादीगु खः ।

थीथी ब्वनेकुथिया झिंखुम्ह विद्यार्थीपिंसं ब्वति काःगु रथजात्रा सम्बन्धी च्वसु च्वज्या कासाय् श्लेष्मा बाबा वज्राचार्य (शांकारी स्कुल) न्हाप, नस्वाः जोशी (पाठशाला स्कुल) लिउ व सनिशाथापा मगर (लियांलिउ) लाःगु खः । वय्कःपिंत छसिकथं न्हय्द्वः, न्याद्वः व स्वद्वः तका दांलिसें दसिपौ लःल्हाःगु खः ।

अथे हे उगु च्वसु कासाय् लुभा महर्जन (मैत्री स्कुल), उध्यान शाह (भास्सरा स्कुल), सामना महर्जन (भास्सरा स्कुल), सचेतना महर्जन (जगतसुन्दर ब्वनेकुथि)ं व इशिका महर्जन (थेच्व नेवाः इ. स्कुल)यात हःपाःकथं म्हति द्वःछितका दांलिसें दसिपौ लःल्हाःगु खः ।

निर्णायकमण्डलया दुजः सकृति शाहीं च्वसु कासाया विजेताया नां घोषणा यानादीगु खःसा मेम्ह निर्णायकमण्डलया दुजः उदेन न्हूसाय्मिं च्वसुयात गुकथं दुवालेगु ज्या जूगु धइगु बारे जानकारी बीगु नापं थुकथंया ज्याझ्वलं मस्तय्त नेवाः संस्कृतिया बारे दुग्यंक जानकारी बी फइगु जूगुलिं वइगु दिनय् थुकथंया ज्याझ्वलय् मस्तय् सहभागिता अप्वयेकेत अभिभावकं नं चिउताः तयेमाः धयादिल ।

अथे हे मेम्ह निर्णायकमण्डलया दुजः दर्शनवीर शाक्यं न्हापांखुसी थुकथंया कासा जूगुलिं च्वखँय् दयेमाःगु विशेषताया निंतिं वइगु दिनय् च्वखँ च्वयेमाःगु प्रशिक्षण बीगु स्वयेमाः धयादिल ।

ज्याझ्वलय् नेवाः स्यनामि नेपालमण्डलया कायबहादुर नेपाली, काठमाडौं नेवाः किन्डरगार्टेनया निर्देशक राजेन्द्र महर्जन, नेवाः सचेतना दबूया राजाराम धौभडेल, तोखा नेवाः ग्वाहालि पुचःया श्रीकृष्ण महर्जन, शांकरी स्कुलया नेपालभाषा स्यनामि सोनी श्रेष्ठ, मोडर्न नेवाः इंग्लिश स्कुलया स्यनामि यशोदा पाण्डे, आदर्श उमावि थिमिया पुलांम्ह प्रधानाध्यापक विद्या चित्रकार, नेवाः शिक्षा समितिया देवदास मानन्धर लगायत नेपालभाषा शिक्षा ख्यलय् वयाच्वंगु थीथीकथंया समस्यायात कयाः कुलादीगु खः ।

थेच्व नेवाः इंग्लिश स्कुलया प्रिन्सिपल नविन थेच्वमिं लकसुस यानादीगु ज्याझ्वःया संयोजन व सिरपाःया प्रायोजन मोडर्न नेवाः इंग्लिश स्कुलं याःगु खः ।