पद्मरत्नया जंक्व याइगु

येँ – जाति भाषा आन्दोलनया न्ह्यलुवा लिसें वरिष्ठ मानव अधिकारवादी नेता पद्मरत्न तुलाधरया ज्याजंक्व याइगु जूगु दु । थ्वहे वइगु भाद्र २३ गते वय्कः ७७ दँ ७ ला क्यनीगु लसताय् लाकाः थ्व जंक्व यायेत्यंगु खः ।

थ्व लसताय् वय्कःया पारिवारिक पुजाआजा नापं नेवाः लिसें आदिवासी जनजाति ख्यलं सार्वजनिक अभिनन्दन नं याइगु खँ सीगु दु । उकिया लागिं नांजाःम्ह समाजसेवी, उद्योगपति लिसें भाषासेवी लक्ष्मीदास मानन्धरया अध्यक्षताय् छगू अभिनन्दन समारोह समिति गठन यानाः ज्या न्ह्याकीगु जूगु दु । म्हिगः नेवाः लिसें आदिवासी जनजाति ख्यःया न्ह्यलुवापिनि दथुइ जूगु छगू मुँज्यां थुकिया बारे सहलह याःगु खः ।