कसाः मिसा व युवा पुचःया मंकाः हिदान

येँ – कसाः तःधं गुथि अन्तर्गत निगू कवःया मंकाः ग्वसालय् हिदान ज्याझ्वः जुल । गुथि अन्तर्गतया कसाः मिसा पुचः व कसाः युवा पुचःया ग्वसालय् वंगु शनिवाः केलत्वालय् उगु हिदान ज्याझ्वः जूगु खः ।

नेपाःया न्हापांम्ह हिदातालिसें समाजसेवी दयावीर सिंह कसा व नेपाल ब्लड डोनर्स एशोसियसन (ब्लोदान)या संस्थापक नायः शरद कसाः ‘कसाःछेँ’या किपाय् स्वां देछासे उगु हिदान ज्याझ्वः न्ह्याःगु खः ।

मिसा पुचःया रसवन्ति कसाःया सभापतित्वय् जूगु बःचाधंगु ज्याझ्वलय् येँ महानगरपालिका २५ वडाअध्यक्ष नीलकाजी शाक्य मूपाहांकथं झायादीगु खःसा ज्याझ्वलय् गुथिया नायः पूर्णवीर सिंह कसाः, मिसा पुचःया नायः वीणा कसाः, युवा पुचःया नायः उज्वल कसाः, मिसा पुचःया निवर्तमान नायः मिराज्योति कसाः, हिदान ज्याझ्वःया सल्लाहकार रविन्सन कसाःपिंसं हिदानया थीथी पक्षयात कयाः थःथःगु नुगःखँ तयादीगु खः ।

थ्व हे झ्वलय् थीथी स्वंगू संस्थाया मंकाः ग्वसालय् थनया वसन्तपुलिइ नं छगू हिदान ज्याझ्वः जुल । रोटरी क्लब अफ चन्द्रागिरि, पे्ररणा पुञ्ज व नेपाल रेडक्रस सोसाइटी गणबहाल उपशखाया मंकाः ग्वसालय् उगु हिदान ज्याझ्वः जूगु खः ।

हिदान ज्याझ्वलय् उपशाखाया सभापति अमृतनारायण मानन्धर, नेपाल रेडक्रस सोसाइटीया डा. मनिता राजकर्णिकार, रोटरी क्लब अफ चन्द्रागिरिया पुलांम्ह नायःलिसें पुञ्जया महासचिव डा. अमिता शाक्य प्रधानया उपस्थिति दुगु खः ।

सम्बन्धित बुखँ

LEAVE YOUR COMMENTS