नेवाःतय्सं नं राजनीति यायेमाः

ख्वप – शहरी विकास राज्यमन्त्री रामवीर मानन्धरं नेवाःत नं राजनीति न्ह्यज्याः वनेमाःगु खँ धयादीगु दु । भक्तपुर मानन्धर युवा संघया ग्वसालय् वंगु शुक्रवाः जूगु हना ज्याझ्वलय् न्ववानादिसें राज्यमन्त्री मानन्धरं व्यापार व्यवसाय निसें शिक्षा, स्वास्थ्य, कासा, सामाजिक फुक्क ख्यःलिसे राजनीतिया स्वापू दयाच्वनीगु जूगुलिं नेवाःतय्सं नं राजनीति सयेका वनेमाःगु खँ धयादीगु खः । ज्याझ्वलय् न्ववानादिसें वय्कलं आः ख्वपय् नं मानन्धर समुदायपाखें सांसद जुइफयेमाः धयागु भिंतुना नं देछायादिल ।

ज्याझ्वलय् राज्यमन्त्री मानन्धरयात संघपाखें हनेज्या नं याःगु खः । संघया नायः न्हुछेरत्न मानन्धरं वय्कःयात खादां क्वखायेकाः हनापौ देछायादीगु खः । अथेहे नेवाः पत्रकार राष्ट्रिय दबूया न्हूगु कार्यसमिति पदाधिकारीपिं लिसें थीथी व्यक्तित्वपिंत नं संघपाखें हनेज्या याःगु खः । ज्याझ्वलय् भक्तपुर उद्योग वाणिज्य संघया वरिष्ठ उपाध्यक्ष शिवप्रसाद मानन्धर, भक्तपुर मानवअधिकार संगठनया सभापति रामकृष्ण मानन्धर, भक्तपुर शारीरिक सुगठन तथा फिटनेस संघया अध्यक्ष बाबुकाजी मानन्धर व प्रथम उपाध्यक्ष ज्ञानेन्द्र मानन्धर, ख्वप मिडिया सर्कलया अध्यक्ष राजु मानन्धर, राष्ट्रिय ज्ञानमाला संघ ख्वप कचाया कोषाध्यक्ष तुलसीकाजी मानन्धर व मोर्डन युथ सोसाइटीयात नं हनापौ देछाःगु खः ।

अथेहे संघया नायः न्हुछेरत्न मान्नधरयात चेम्बर अफ कमर्स भक्तपुरया अध्यक्षय् निर्वाचित जुयादीगुलिं केन्द्रीय मानन्धर संघया सभापति बद्रीनारायण मानन्धरया ल्हातं हनापौ देछाःगु खः । ज्याझ्वलय् संघया नायः मानन्धर संघया वार्षिक कार्ययोजना नं न्ह्यब्वयादीगु खः।