ने. सं. ११४४ कौलाथ्व षष्ठी -

छाय् जुल अली मुस्मां

अमेरिकाया महान बक्सर मोहम्म्द अलीं सार्वजनिक रुपं सन् १९६४ य् इस्लाम कबूल याःगु खः । मोहम्मद अलीया जीवनय् थ्व तसकं हे असाधारण पलाः खः । वया आलोचकत इस्लाम कबूल याःगुलिं व खनाः तसकं तम्वःगु खः । वयागु गृहनगरया पत्रपत्रिकातय्सं ला लिपा थ्यंकं व बूबलय्या नां क्यासियस क्ले हे तयाः समाचार छापे यायेगु यानाच्वंगु खः ।

अमेरिका व भियतनाम दथुइ ल्वापु जुयाच्वंगु इलय् अलीं भियतनाम युद्धय् ब्वति कायेत अस्वीकार याःगु खः । उकिं वयागु उपाधीलिसें वयात बिया वयाच्वंगु सुविधा अमेरिकी सरकारं लित कयाबिल । अमेरिकी सरकारया थ्व हे निर्णय अन्तय् अलीयात छम्ह मजबूत मनूया रुपय् स्थापित यानाबिल ।मोहम्मद अलीया जन्म सन् १९४२ जनवरी १७ य् जूगु खः । अलीं इस्लाम कबूल यानागु कारण बिस्कं कथं हे धाःगु दु ।

सन् १९६७ य् ज्याक ओल्सेनं ‘ब्लायक इज बेस्ट ः द रिडल अफ क्यासियस क्ले’ नांया छगू सफू च्वःगु खः । उगु सफुलिइ अलीं धयातःगु दु, ‘न्यूयोर्कया हर्लेम सतक सिथय् वं न्हापांखुसी छम्ह धर्म परिवर्तन याकीम्ह मनू नापलाःगु खः ।’तर लिपा वनाः अलीं सन् १९६० व १९६१ या सुरुवातपाखें मयामी जूगु मुस्मां देय्तय् बैठकया इलय् धर्म परिवर्तन यानागु खँ धाःगु दु । लिसें वं धर्म परिवर्तन याकीम्ह मनूयात शिकागोय् नापलानागु खँ नं धाःगु दु ।

तर थ्व फुक्कं स्वयां बिस्कं हे दु क्यासियस क्ले मुस्मां जुयाः मोहम्मद अली जूगुया बाखं । आःतक थ्व बाखंयात हे दकलय् अप्वः विश्वसनीय धया वयाच्वंगु दु । टाइम पत्रिकाय् थुकिया बारे वेबसाइटय् प्रशारण याःगु खः । ‘अली ः ए लाइफ, आउट इन अक्टुबर फ्रम हाटिन मिफलिन हरकोर्ट’ नांया छगू सफू वयेत्यंगु दु । थ्व सफूया च्वमि खः– जोनाथन ईग । थ्व सफूया छगू ब्वय् छपु पौया खँ न्ह्यथनातःगु दु, गुगु पौ अलीं थः निम्हम्ह कलाः खलिलाह कामाचो–अलीयात च्वःगु दु ।

अली व कामाचो दथुया इहिपा सन् १९६७ निसें ७६ तक जक न्ह्यात । कामाचो अलीं थ्व पौ सन् १९६० पाखें मोहम्मद अलीं च्वःगु खँ धाःगु दु ।
अलीं उगु पतिइ थम्हं नेशन अफ इस्लाम अखबारय् वःगु छगू कार्टुन स्वयागु खँ न्ह्यथनातःगु दु । थःगु गृहनगर लुइवेलय् स्केटिङ रिंग पिने च्वनाः वं उगु कार्टुन स्वःगु जुयाच्वन । कार्टुनय् क्यनातःगु जुयाच्वन, गुकथं तुयुम्ह मालिकं क्रूरतापूर्वक थः दासयात दायाच्वंगु दु, अले मेखे जिससया प्रार्थना नं यानाच्वंगु दु ।

थुकी यचुक हे क्यनातःगु जुयाच्वन कि इसाइ धर्म धयागु तुयुपिं दमनकारितय् जक धर्म खः ।अलीयात थ्व कार्टुन तसकं यल । अलीं पतिइ च्वयातःगु दु, उगु कार्टुनया लिच्वः वयात नं लात, अले उबलय् निसें हे धर्म परिवर्तनया बिचाः वल । कामाचो अलीं मोहम्मद अलीयाके इहिपा न्ह्यःया सम्बन्धयात कयाः न्यंगु जुयाच्वन । वं अलीयात थ्व मामिलाय् छपु पौ च्वयेत नं धाःगु जुयाच्वन । कामाचों हे वयात इस्लाम धर्मय् वनेमाःगु सल्हा बिउगु खः ।