नेपालभाषाया ‘ख्वबि’ संकिपाया प्रदर्शन व कलाकार हना

ख्वप (नेपालभाषा टाइम्स) – सुप्रसिद्धि फिल्मस् प्रालिया न्ह्यब्वया नेपालभाषाया न्हूगु संकिपा ‘ख्वबि’या प्रिमियर शो याःगु दु । थनया कमल विनायक हलय् जूगु संकिपाया प्रिमियर शोलिसें संकिपाया कलाकार व प्राविधिकपिंत हनेज्या नं याःगु खः ।

सुप्रसिद्धि फिल्मस् प्रालिया अध्यक्ष प्रकाश सैंजूया सभापतित्वय् जूगु ज्याझ्वलय् नांजाःम्ह वरिष्ठ कलाकार आशाकाजी थकु मूपाहांकथं झायादीगु खः ।

समाजय् जुइगु दुःख, पीडा, त्याग, मतिना, मानवीय संवेदनाया विषय कःघानाः काल्पनिक बाखंया लिधंसाय् संकिपा निर्माण यानातःगु खः । निर्माता सेम श्रेष्ठया मुख्य भूमिका दुगु संकिपाय् सजिना नापित, श्याम माक श्रेष्ठ, शान्ति राजवाहक, साहु प्रजापति, प्रकाश वज्राचार्य, राज्यश्वरी शिल्पकार लगायतया आपालं कलाकारया अभिनय दुथ्यानाच्वंगु दु ।

संकिपाया छाँयाकन सुरेश ख्वाक श्रेष्ठं व सम्पादन विक्रम शंखदेवं यानादीगु खःसा नृत्य निर्देशन बालमुकुन्द श्रेष्ठं यानादीगु खः । संकिपाया च्वमि व निर्देशक श्याम माकः श्रेष्ठ खः ।

प्रिमियर लिपा वरिष्ठ कलाकार आशाकाजी थकुं संकिपाया कलाकार व प्राविधिकपिंत खादा क्वखायेकाः हनापौ देछासे हनेज्या यानादीगु खः । ज्याझ्वलय् मूपाहां थकु, नांजाःम्ह वरिष्ठ म्येँ हालामि जुजुकाजी रञ्जितं संगीत संकिपाया थीथी पक्ष व संकिपाय् दइगु म्येँया थीथी पक्षयात कयाः नुगःखँ तयादीगु खः ।

ज्याझ्वलय् नांजाःपिं म्येँ हालामिपिं संगीता थापा शाक्य, सरस्वती मानन्धर, लय्चिनामि जुगल डंगोल, रविन दर्शनधारी, राजकुमार मानन्धर लगायतया उपस्थिति दुगु खः ।