नेपाः ऐतिहासिक सफलतापाखे

दक्षिण एशियाया हे दकलय् तःधंगु कासा महोत्सव थुगुसी नेपालय् न्ह्यानाच्वंगु दु । झिंस्वक्वःगु दक्षिण एशियाली कासा (साग) थुगुसी नेपालं ग्वसाः ग्वःगु खः । अले थ्व कासा अन्तर्गत नीखुगू कासाय् स्वनिगःया लिसें पोखरा व जनकपुरय् जुयाच्वंगु दु । नीदँ लिपा नेपालय् लिहां वःगु दक्षिण एशियाली कासा महोत्सव नेपाःया निंतिं कासाय् थःगु शक्ति क्यनेगु ह्वःताः नं जुयाच्वंगु दु ।

थ्व कासा महोत्सव सुरु जूगु प्यन्हुया दुने नेपालं थःगु शक्ति क्यनेगु झ्वलय् बांलाःगु प्रदर्शन नं यानाच्वंगु दु । कासा सुरु जूगु प्यन्हु (बिहीवाः सुथय् तक)या दुने नेपालं ३१ गू स्वर्ण सहित ७१ गू पदक त्याकेधुंकूगु दु । स्वर्ण पदकया ल्याखं नेपालय् जूगु च्याक्वःगु सागय् त्याकूगु स्वर्णया बराबरी खः । नेपालं मेगु नं स्वर्ण त्याकेफइगु कासा अझं म्हिताच्वंगु दनि ।

थ्व ल्याखं स्वयेबलय् दक्षिण एशियाली कासाय् नेपाःया थ्व आःतकया दकलय् बांलाःगु प्रदर्शन जुइ । उसुइ जूगु २२ गू स्वर्णया धेंधेंबल्लाखय् बुधवाः तक प्यंगू स्वर्णया निंतिं जक कासा जूगुलिं थुकी अझं स्वर्ण त्याकेफइगु ह्वःताः दनि । थुगुसी जुयाच्वंगु २६ गू कासा मध्ये नेपालं बुधवाः तकया दुने तेक्वान्डोय् दकलय् अप्वः झिंछगू स्वर्णसहित १५ गू पदक त्याकेधुंकूगु दु ।

अथेहे करातेय् झिगू स्वर्ण सहित १९ गू पदक ल्हातय् लाकल । थ्व धुंकाः उसुइ न्यागू स्वर्ण, साइकलिङ्गय् निगू, एथलेटिक्सय् छगू, ट्रायथोलनय् छगू, डुवाथोलनय् छगू स्वर्ण त्याकेधुंकूगु दु । नेपाःया वर्चश्व दुगु कराते व तेक्वान्डोय् आःतक दकलय् अप्वः पदक त्याकूसां च्याक्वःगु सागय् स्वयां धाःसा म्हो हे खः ।

नेपालय् हे सन् १९९९ य् जूगु च्याक्वःगु सागय् कराते व तेक्वान्डोय् झिंप्यंगू झिंप्यंगू स्वर्ण त्याकूगु खः । वंगु आइतवाः निसें न्ह्याःगु थुगुसीया साग धेंधेंबल्लाः नेपाःया मेमेगु कासाया निंतिं ऐतिहासिक जुयाबिउगु दु । एथलेटिक्स, साइकलिङ, ट्रायथोलन, डुवाथोलनय् नेपालं थुगुसी न्हापांगुखुसी स्वर्ण त्याकल ।

एथलेटिक्स १०००० मिटर ब्वाज्याय् सन्तोषी श्रेष्ठं त्याकूगु स्वर्ण ला आश्चर्यजनक नं जूवंगु दु । सन्तोषीं थुकी भारतीय प्रतिद्वन्द्वीयात मात्र १ मिलिसेकेन्डं लिउने लाकाः स्वर्ण ल्हातय् लाकूगु खः । साइकलिङय् नं ऐतिहासिक स्वर्ण त्याकेगु झ्वलय् १ किलोमिटर दूरीया डाउनहिलय् मिजंतय् पाखे राजेश मगरं मिस्तय् पाखे निश्मा श्रेष्ठं स्वर्ण त्याकूगु खः ।

अथेहे ट्रायथोलनय् मिस्तय्पाखे सोनी गुरुङ स्वर्ण त्याकलसा मिजंतय्पाखे डुवाथोलनय् हिमाल टमाटां स्वर्ण त्याकूगु खः । भलिबल पाखे मिस्तय्गु टिमं रजतय् चित्त बुझे यायेमाःसां थ्व नं नेपाःया निंतिं ऐतिहासिक पदक जूगु दु । नेपालं आःतक भलिबलय् कास्यबाहेक पदक त्याकेफुगु मदुनि । भारतलिसे जूगु फाइनलय् कासाय् पराजित जूसां नेपाली कासामितय्गु जुझारु कासां सकलें खेलप्रेमीतय्त लय्तायेकूगु दु ।

फुटबलय् बल्लाःगु टिम
भूटान नेपाःपाखें प्यंगू गोलं पराजित जुइधुंकाः जूगु पोस्ट म्याच प्रेस कन्फरेन्सय् भूटानया प्रशिक्षकं धाल, ‘नेपाः बल्लाःगु टिम खः । थुगुसी नेपाः पदकया दावेदार नं खः ।’भूटानी प्रशिक्षकं धाःकथं धाथें थुगुसी नेपाः फुटबलय् स्वर्णया दावेदार खः । अले थुगु दावेदारी कथं नेपालं बांलाःगु प्रदर्शन नं यानाच्वंगु दु ।

भूटानयात प्यंगू गोल नकाः न्हापांगु कासाय् शानदार विजय चूलाकूगु नेपालं निगूगु कासाय् श्रीलंकालिसे छगू छगू गोलया बराबरी म्हितल । तर थ्व कासाय् नेपाःया प्रदर्शनं दर्शकत गाक्कं लय्ताःगु दु, अले धाथें थुगुसी नेपाःयात दावेदार कथं हे माने यानाच्वंगु दु । उकिसनं थुगुसी भारत व पाकिस्तानं फुटबलय् ब्वति मकाःगुलिं नं नेपाःयात बांलाःगु ह्वताः चूलानाच्वंगु दु ।

भारत व पाकिस्तान मम्हितूगुलिं थुगुसीया फुटबल राउन्ड रोविन ल्याखं म्हिताकाच्वंगु दु । नेपाः आः ४ अंकसहित शीर्षस्थानय् दु । भूटान निगू कासा म्हिताः ३ अंक दुसा माल्दिभ्स व श्रीलंकाया २–२ अंक दु । बंगलादेशया धाःसा १ अंक जक दु । लिग चरणय् दकलय् अप्वः ल्याः काःगु निगू टिमं फाइनल कासा म्हिती ।