थेरवाद बुद्धिष्ट एकेदेमिया प्राचार्य डा. शाक्यया लुमन्तिइ श्रद्धाञ्जली देछा

येँ (नेपालभाषा टाइम्स) – थेरवाद बुद्धिष्ट एकेदेमिया प्राचार्य बहुआयामिक व्यक्तित्व डा. महेन्द्ररत्न शाक्यया लुमन्तिइ धर्मसंवेगपूर्ण श्रद्धाञ्जली सभा जुल । एकेदेमिया प्राचार्यलिसें प्राज्ञिक व्यक्तित्व, परियत्ति शिक्षाया अभियन्ता, अनुसन्धानकर्ता, बौद्ध साहित्यया साधक, वरिष्ठ बौद्ध विद्वान, मूर्तिकार मदुम्ह डा. शाक्या लुमन्तिइ वंगु असार २३ गते मंगलवाः विश्व शान्ति विहार, न्हू बानेश्वरय् जुल ।

एकेदेमिया अध्यक्ष भिक्षु निग्रोध महास्थविरया सभापतित्वय् जूगु धर्मसंवेगपूर्ण श्रद्धाञ्जली सभाय् मूपाहांकथं बिज्याःम्ह अखिल नेपाल भिक्षु महासंघया अध्यक्ष श्रद्धेय भिक्षु फ्राखु विशाल धम्मशोभन महास्थविरपाखें पंचशील बियाबिज्याःगु खः ।

भिक्षु संघपाखें अनित्य भावना पाठ याना बिज्याःगु ज्याझ्वलय् पुलांम्ह प्रधानमन्त्री झलनाथ खनाल विशेष पाहाकथं झायादीगु खः । सभायात संबोधन यासें खनालं मदुम्ह डा. शाक्यया व्यक्तित्व, बौद्ध धर्मया ख्यलय् बियादीगु योगदानलिसें वय्कःया थीथी पक्षयात कयाः नुगःखँ तयादीगु खः ।

बौद्ध विद्वान डा. अमिता धाख्वां मदुम्ह डा. शाक्यया जीवनी कनादीगु खःसा उगु इलय् मदुम्ह डा. शाक्यं च्वयादीगु ‘अभिधर्म–चेतसिकया म्हसीका’ नांया सफूया नं पितब्वज्या याःगु खः ।

ज्याझ्वलय् लोटस कलेजया प्राचार्य वीरकाजी शाक्य, अक्षेश्वर कलेजया प्राचार्य नरेश शाक्य, बौद्ध विद्वान मदनरत्न मानन्धर, बिद्यालक्ष्मी वज्राचार्य, सुष्मा वज्राचार्यं नं मदुम्ह डा. शाक्यया बारे नुगःखँ तयादिसें बिचाः हायेकादीगु खः ।

उगु हे ज्याझ्वलय् एकेदेमिया न्हूम्ह प्राचार्यय् डा. त्रिरत्न मानन्धरयात नियुक्त यानागु घोषणा नं याःगु खः । सभाया सभापति भिक्षु निग्रोध महास्थविरं एकेदेमिया प्वनाच्वंगु प्राचार्यय् डा. मानन्धरयात नियुक्त यानागु घोषणा यानाबिज्याःगु खःसा पुण्यानुमोदन लिपा एकेदेमिया न्हूम्ह प्राचार्य डा. मानन्धरयात नियुक्तिलिसें पदभार ग्रहण नं याकूगु खः ।