ने. सं. ११४४ ञलाथ्व नवमी -

भारतविरुद्ध निगुलिं कासा त्याकेमाः – प्रशिक्षक अलमुताइरी

येँ – नेपाः राष्ट्रिय टिमया मुख्य प्रशिक्षक अब्दुल्लाह अलमुताइरीं भारतविरुद्ध जुइगु निगुलिं मैत्रीपूर्ण कासा त्याकेमाः धाःगु दु । प्रशिक्षक अलमुताइरीं नेपालं कासा बराबरीया निंतिं मखुसे त्याकेगु निंतिं म्हितेगु जुइ धाःगु दु ।

नेपाः व भारतया दथुइ भदौ १७ गते बिहिवाः व भदौ २० गते आइतवाः जुइत्यंगु मैत्रीपूर्ण कासा स्वयां न्ह्यः बुधवाः जूगु प्रि–म्याच कन्फरेन्सय् पत्रकारतलिसें खँ ल्हायेगु झ्वलय् प्रशिक्षक अलमुताइरीं भारतविरुद्धया कासा बराबरीया निंतिं मखुसे त्याकेगु निंतिं म्हितेगु धकाः धाःगु खः । भारतविरुद्धया कासा त्याकल धाःसा नेपाःया वरियताय् नं सुधार जुइगु अलमुताइरीं धाःगु दु । अलमुताइरी धाःगु दु, ‘कासामितय्सं न्ह्ययपुकेगु निंतिं निंतिं मखुसे राष्ट्रिय टिम व देय्या गर्वया निंतिं म्हितेगु जुइ । कासा इतिहास व विपक्षी सु खः धकाः मखु, बांलाःगु रिजल्टया नितिं म्हितेगु खः । इतिहास मखु, टिमया भविष्य गथे यानाः बांलाकेगु व स्वयाः म्हितेगु जुइ । नेपाःया टिमयात थ्व कासां न्हूगु उचाइलय् थ्यंकी ।’ अलमुताइरीं टिमया मू आज्जु साफ त्याकेगु नं धाःगु खः ।

प्रि–म्याच कन्फरेन्सय् पत्रकारलिसें खँ ल्हासें नेपाः राष्ट्रिय टिमया कप्तान किरण चेमजोङं भारतविरुद्ध म्हिते अःपु मजूसां नेपाःया टिमं यक्व तयारी यानाच्वंगु धाःगु दु । नेपाःया टिम शारीरिक व मानिसक रुपं बल्लाःगुलिं भारतलिसे म्हितेत नेपाल तयार जूगु कप्तान चेमजोङं धाःगु खः । कप्तान चेम्जोङं प्रशिक्षक अलमुतराइरी वयेधुंकाः टिमया आत्मविश्वास नं बल्लाःगु धाःगु दु । चेम्जोङं थःगु १३ दँया कासा जीवनय् अलमुताइरी फादर फिगरया रुपय् वःगु नं धाःगु दु ।

भारतया प्रशिक्षक इगोर स्टिमेकं नेपाःलिसे जुइगु कासा अःपु मजुइगु धाःगु दु । नेपाः साफया दाबेदार जूगु व नेपाःया टिमयात सामान्य रुपं मकयागु प्रशिक्षक इगोरं धाःगु खः । भारतया कप्तान सुनिल क्षेत्रीं नेपाः बल्लाःगु प्रतिद्वन्द्वी जूगु व नेपालं घरेलु मैदानय् म्हितीबलय् नेपाःया टिमया स्वरुप हे मेगु जुइ धाःगु दु । नेपाःया टिमयात कमजोर मतायेकागु नं भारतया कप्तान क्षेत्रीं धाःगु दु ।

नेपाः व भारतया दथुइ भदौ १७ गते बिहिवाः व भदौ २० गते आइतवाः दशरथ रंगलशालाय् सनिलया ५ः३० ता इलय् निगू मैत्रीपूर्ण कासा जुइत्यंगु खः । रंगशालाय् कासा स्वःवइपिं दर्शकतय्त अनुमति बिइगु जूगु दु । सरकार न्याद्वः व सछि दर्शकयात अनुमति बिउगु दु । कासा स्वःवइपिंं निगुलिं डोज खोप कायेधुंकूपिं जुइमाः व पिसिआर रिपोर्ट नेगेटिभ जुइमाः ।

नेपाः व भारतया दथुइ आःतक १९ क्वः कासा जुइ धुंकूगु दु । नेपालं भारतयात आःतक निक्वः जक बुकूगु दुसा भारतं नेपाःयात झिंस्वक्वः बुकूगु दु । मेगु प्यक्वः बराबरी म्हितुगु खः ।
नेपालं भारतयात सन् २०१३य् जूगु साफय् बुकेधुंकाः मेगु छक्वः नं बुकेफुगु मदुनि । फिफा वरीयताय् नं भारत नेपाः सिबें यक्व हे न्ह्यःने लाः । नेपाः फिफा वरीयताय् १६८ औ थासय् दुसां भारत १०५ आंै थासय् दु ।