महानगरया थःगु हे अत्याधुनिक खाद्य प्रयोगशाला
येँ (नेपालभाषा टाइम्स) – येँ महानगरपालिकां खाद्य सुरक्षा व गुणस्तर परीक्षणया निंतिं थःगु हे प्रयोगशाला संचालनय् हःगु दु । महानगरपालिकां खाद्य सुक्ष्मजीव परीक्षणया निंतिं माइक्रोबायोलोजी प्रयोगशाला (ल्याब) संचालनय् हःगु खः । खाद्य सुरक्षा व गुणस्तर परीक्षण प्रभावकारी यायेगु ल्याखं फुड बायोलोजिकल टेस्टिङ ल्याब्रोटोरी काठमाडौं प्लाजाया न्यागूगु तल्लाय् बुधवाःनिसें संचालनय् हःगु खः ।
येँ महानगरपालिकाया कार्यवाहक प्रमुख सुनिता डंगोलं प्रयोगशालाया छगू ज्याझ्वःया दथुइ शुभारम्भ यानादीगु खः । प्रयोगशालाया उलेज्या यासें कार्यवाहक प्रमुख डंगोलं आः बजाः अनुगमन यायेबलय् खने दइगु त्रुटि व कमि कमजोरीयात अनुमानया भरय् गुणस्तर निर्धारण याना च्वनेमाली मखु धयादिल । आः खाद्य गुणस्तया परीक्षण कानुनी कारवाही व वैज्ञानिक तथ्यया लिधंसाय् जुइगु व थ्व हे तथ्यया लिधंसाय् बजाः नियमन, अनुगमन व नियन्त्रण नं जुइ धयादिल ।
महानगरं थःगु हे प्रयोगशाला स्थापना व संचालनलिसें खाद्य नमूनाया परीक्षण नं याकनं जुइगु व बजाः अनुगमनयात नं थप प्रभावकारी यायेत ग्वाहालि जुइगु वय्कलं धयादीगु दु । खाद्य ज्वलंया प्रयोगशाला परीक्षणय् समस्या फयेमाला च्वंगुलिं महानगरपालिका थम्हं हे प्रयोगशाला संचालनय् हयागु नं वय्कलं कनादिल । थःगु हे प्रयोगशाला मदुगुलिं परीक्षणया प्रतिवेदन वयेत नं लिबानाच्वनीगु व थुकिं यानाः अनुगमन प्रभावकारी जुइ मफयाच्वंगु वय्कःया धापू दु । आः थःगु हे प्रयोगशाला दयेधुंकाः प्रारम्भिक परीक्षण याये फइगु जूगुलिं अनुगमनयात नं तीव्रता बीगु व थप प्रभावकारी याना यंकेत सहज जुइगु वय्कलं धयादिदल ।
प्रमुख प्रशासकीय अधिकृत सरोज गुरागाँइं प्रयोगशाला स्थापना लिपा आः महानगरपालिकां वैज्ञानिक परीक्षण यानाः याकनं, विश्वस्त व प्रमाणया लिधंसाय् निर्णय काये फइ धयादिल । वय्कलं परीक्षणपाखें प्राप्त तथ्यया लिधंसाय् खाद्य स्वच्छता, गुणस्तर, नियमन, नियन्त्रण प्रक्रिया नं तथ्य आधारित जुइ धयादिल ।
महानगरपालिकाया खाद्य स्वच्छता विज्ञ सल्लाहकार जीवनप्रभा लामां खाद्य सेवाय् स्वच्छता कायम यायेगु अभियानय् प्रयोगशालाया स्थापना महानगरपालिकाया छगू महत्वपूर्ण उपलब्धि जूगु खँ कनादिल ।
थुगु प्रयोगशालाय् साल्मोनेला एसपीपी, इसेरिसिया कोलाइ (इकोलाई), कुल प्लेट गणना (टोटल प्लेट काउन्ट), स्टाफिलोकोकस ओरियस, कुल
मोल्ड गणना (टोटल मोल्ड काउन्ट), फिकल कोलिफर्म लगायत रोगजन्य व सुक्ष्म जीवया परीक्षण याये फइ । प्रयोगशालाय् नमूना परीक्षण निसें परीक्षण प्रतिवेदनतकया सकतां प्रक्रिया वैज्ञानिक विधिकथं जुइगु विभागं जानकारी बिउगु दु ।
LEAVE YOUR COMMENTS