चाँगुनारायणय् धिमे बाजं व प्याखंया ब्वज्या
ख्वप (नेपालभाषा टाइम्स) – विश्व सम्पदाया धखलय् दुथ्यानाच्वंगु थनया ऐतिहासिक, धार्मिक लागालिसें मूर्त सम्पदा चाँगुनारायणय् अमूर्त सम्पदा धिमे व हुलाप्याखं ब्वज्या जूगु दु । नेपाःया इतिहास, कला, संस्कृति, सभ्यता व सम्पदाया छगू अनुपम नमूनाया केन्द्र लिसें विश्व सम्पदाया धलखय् दुथ्यानाच्वंगु चाँगुनारायण द्यःया परिसरय् वंगु आइतवाः मंकाः धिमे व प्याखंया ब्वज्या याःगु खः ।
‘चाँगुनारायणया जय, झी सकसिगुं मंकाः गन्तव्य’ धइगु मू नारा बियाः दर्पण नेपालया ग्वसालय् मंकाः धिमे प्याखं व बाजं ब्वज्या जूगु खः । बाला इभेन्ट्सया संयोजनय् जूगु ज्याझ्वलय् सछिगः धिमे, सछिगू प्याखं व निसः स्वयां अप्वः कलाकारं थःगु मंकाःकथंया प्रस्तुति बिउगु खः । देगः परिसर छगुलिं जायेक बाद्यवादक व कलाकारया प्रस्तुतिं चाँगुनारायण लागायात हे सांस्कृतिक उत्सवमय याना बिउगु खःसा परम्परागत धिमे बाजंया सलं नेवाः कला, संस्कृति व नेवाः सांस्कृतिक हुलाप्याखनं स्थानीय, आन्तरिक व वाह्य पर्यटकयात मुग्ध याना बिउगु खः ।
धिमे बाजं व हुलाप्याखं ब्वज्याय् खगां दाफा भजन खलः, कार्यविनायक धिमे बाजं खलः, देवी सांस्कृतिक बाजं खलः, माझी भैरव सांस्कृतिक समूह, वनदेवी बाजं खलः, चम्पक धिमे खलः, सिमल्टार बाजं खलः, निओफ्युजन बाजं खलकं प्रस्तुति बिउगु खः । चाँगुनारायण विकास समिति, देवी माध्यमिक विद्यालय, एसएस सद सेकेन्डरी स्कुल, गणेश माध्यमिक विद्यालय, आरक्षण नेशनल एकेदेमि, लगायतया शैक्षिक संस्थाया सहभागिता दुगु ब्वज्याय् थीथी धिमे खलः, दाफा बाजं खलः, भजन खलःया गुरु, अग्रज कलाकारया उपस्थिति दुगु खः ।
ज्याझ्वलय् मूपाहांकथं झायादीम्ह बागमति प्रदेश सरकारया संस्कृति व पर्यटन मन्त्री सुरेश श्रेष्ठं विश्व सम्पदा क्षेत्र चाँगुनारायणयात अन्तर्राष्ट्रिय पर्यटनया गन्तव्यया रुपय् विकास यायेत प्रदेश सरकार प्रतिबद्ध दु धयादिल । वय्कलं नेपाःया मौलिक संस्कृति व परम्परागत धिमे बाजं थेंज्याःगु सम्पदाया संरक्षण यानाः न्हू पुस्तायात लःल्हाना वनेमाःगु थौंया आवश्यकता जूगु खँय् नं बः बियादिल ।
विशेष पाहां चाँगुनारायण नगरपालिकाया प्रमुख जीवन खत्रीं नगरपालिकां धार्मिक, ऐतिहासिक, सांस्कृतिक महतवया सम्पदाया संरक्षण, प्रवद्र्धन व पर्यटन पूर्वाधारया विकासय् निरन्तर लगानी यानाच्वनागु जानकारी बियादिल । लिसें वय्कलं चाँगनारायण द्यः परिसरय् दुगु सम्पदातय्त उत्कृष्ट धार्मिक व सांस्कृतिक गन्तव्यया रुपय् विकस यायेगु उद्देश्यं थीथी योजना न्ह्यःने न्ह्याकाच्वनागु नं कनादिल ।
ज्याझ्वलय् प्रदेश पर्यटन मन्त्रालयया सचिव दीपेन्द्र सुवेदी चाँगुनारायण नगरपालिका ४या वडाअध्यक्ष रोजबहादुर तामाङ, ज्याझ्वःया व्यवस्थापक विजयराम वनमाला लगायतं मूर्त, अमूर्त सम्पदा संरक्षण, पर्यटन प्रवद्र्धन लगायतया विषयय् नुगःखँ तयादीगु खः ।
बागमति प्रदेश सरकार, संस्कृति तथा पर्यटन मन्त्रालयया ग्वाहालि व ताथली धिमे खलःया सहकार्यय् जूगु ज्याझ्वः दर्पण नेपालया अध्यक्ष चण्डिका लामिछानेया सभापतित्वय् जूगु खः ।
LEAVE YOUR COMMENTS