छम्ह हे न्यां लखपति

भारतया मुम्बई सहरय् च्वंपिं निम्ह दाजुकिजा छम्ह जक न्या मियाः लखपति जूगु दु । मुम्बईलय् न्या लायेगु पेशा याना वयाच्वंपिं महेश मेहर व वया किजा भरत मेहर छम्ह हे जक न्या मियाः लखपति जूगु खः । न्ह्याबलें थें न्या लायेत छगः चिग्वःगु डुंगाय् च्वनाः वनाच्वंपिं इमिसं न्या लायेत जाः प्यन ।

जाः तसकं झ्यातुसे च्वनाः इमिसं साले हे मफुत । इमिसं अनुमान यात कि तसकं हे भराय्धिकःम्ह न्या जालय् क्यंगु दु । लिपा समुद्र सिथय् थ्यंकाः स्वःगु इलय् इमिगु जालय् धाथें हे ३० किलो दुम्ह न्या छम्ह क्यनाच्वंगु दु । न्या ज्वनाः समुद्र सिथय् वयेवं इमिगु जालय् तक्यंम्ह न्यायात कयाः तसकं चर्चा जुल ।

चर्चाया कारण ३० किलोया वजन जक मखु, इमिगु जालय् तक्यंम्ह न्या ‘घोल’ जातिया खःसा उम्ह न्या तसकं दुर्लभ नापं अतिकं थिकेम्ह खः । महेश व भरतं घोल जातिया न्या लाःगु समाचार बजाःन्यंकं न्यना वन । लिपा उम्ह न्या मीगु निंतिं लिलाम बढाबढ हे यायेमाल । अले न्या न्यायेत आपालं व्यापारीत नं मुनेगु क्रम शुरु जुल लिपा छम्ह व्यापारी न्यागूत्या लाख पुलाः उम्ह न्या न्यानायंकल ।