आर्मिनिया व अजरबैजान अस्थायी युद्धविरामया निंतिं तयार

एजेन्सी – आर्मिनिया व अजरबैजान अस्थायी युद्धविरामया निंतिं तयार जूगु दु। विवादित नागोर्नो काराबाखयात कब्जाय् कायेगु निंतिं निगू देय् दथुइ तच्वःगु ल्वापु जुयाच्वंगु दु ।

रुसया मध्यस्थताय् झिघौ तक न्ह्याःगु वार्ता लिपा निगुलिं देय् युद्धविराम यायेत तयार जूगु खः । रुसी विदेश मन्त्री सर्गेइ लेभराभं थुकिया जानकारी बियादीगु दु। युद्धविरामया झ्वलय् निगुलिं देसं थःपिनि सीपिं सैनिकत सीम्ह उठे यायेगु लिसें युद्धबन्दी दयेकूपिंत त्वःतेगु ज्या याइ ।

रुसी विदेशमन्त्री सर्गेइ लेभराभं शान्ति कायम यायेगु निंतिं निगुलिं देलिसे वार्ता जारी जारी हे जुइगु खँ धयादीगु दु। नागोर्नो काराबाख इलाकायात कयाः निवाः न्ह्यवनिसें ल्वापु सुरु जुइधुंकाः निगुलिं देय् या प्रतिनिधिपिं न्हापांखुसी वंगु शुक्रवाः मस्कोय् नापलानाः वार्ता न्ह्याकूगु खः । निगुलिं देय्या विदेशमन्त्री दथुइ जूगु वार्ताय् रुसी विदेशमन्त्री लेभराभं मध्यस्थता यानादीगु खः । २७ सेप्टेम्बर निसें न्ह्याःगु थ्व ल्वापुइ लानाः स्वसलं मल्याक मनूतय् ज्यान वनेधुंकूगु दुसा हजारौं मनूत छेँ त्वःताः बिसिउँ वनेमाःगु खः ।

नागोर्नो काराबाखं छगू पहाडी लागा खः गुगु आधिकारिक रुपं अजरबैजानया ब्व खः, तर सन् १९९४ य् जूगु युद्धविराम लिपा थ्व लागाय् आर्मेनिया कब्जा जुयाच्वंगु दु। न्हापा सोभियत संघ दुने लानाच्वंगु आर्मिनिया व अजरबैजानं नागोर्नो काराबाख इलाकाया निसें सन् १९८० निसें १९०० या सुरुइ तक संघर्ष याःगु खः ।