कोरोना भाइरसं सीपिं ४१ म्ह, खुन्हु दुने चीनं अस्पताल दयेकीगु

एजेन्सी- चीनया उहानय् खनेदुगु कोरोना भाइरसया कारणं थप झिंन्याम्ह सीगु खँ धाःगु दु । थुकिया लिसें चीनय् थ्व भाइरसया कारणं सीपिनि ल्याः ४१ म्ह थ्यंगु दु । अथेहे थ्व भाइरस संक्रमित जूपिनि ल्याः १ हजार २८७ म्ह थ्यंगु दु । चीनय् खनेदुगु थ्व भाइरस अमेरिका, दक्षिण कोरिया, एसिया लिपा युरोपनय् खनेदुगु दु । फ्रान्सय् स्वम्हेसित थ्व भाइरसं संक्रमण जूगु पुष्टि याःगु दु । चीनय् न्हूदँ वयेत्यंगु दु । तर भाइरसया कारणं न्हूदँया झ्वलय् यायेत्यंगु यक्व हे ज्याझ्वः रद्द याःगु दु ।

मेखे उहानय् थ्व भाइरसं संक्रमित जूपिंत तयेगु निंतिं न्हूगु हे अस्पताल दयेकेगु ज्या सुरु याःगु दु । थ्व अस्पताल खुन्हु दुने दयेकीगु खँ धाःगु दु । चिनियाँ सञ्चार माध्यमतय् कथं १ हजार बेडया थ्व अस्पताल दयेकेगु ज्या धमाधम जुयाच्वंगु दु । चीनया चान्गजीयाङ पत्रिकां बिउगु समाचार कथं थ्व अस्पतालय् आः खनेदयाच्वंगु अभावयात सम्बोधन याइ व याकनं दयेकेगु ज्या क्वचाइ । थ्व भवन प्रिफ्याबपाखें दयेकीगु जूगुलिं यक्व लगानी नं तुइमखु ।

उहान शहरय् च्वंगु वासः पसलय् आवश्यक सामग्री अभाव सुरु जूगु व अस्पतालय् हतास सर्वसाधारणतय्सं जायाच्वंगु खँ धाःगु दु । कोरोनाभाइरस संक्रमण जुलकि न्हापां ज्वरो वइ, अले सुख्खा मुसु वइ । छुं वा लिपा सासः ल्हाये थाकुया वइ । तर गुलिखे अवस्थाय् थज्याःगु लक्षण खनेमदुसां कोरोना भाइरस संक्रमित ल्वगित नं लूगु खँ विज्ञतय्सं धाःगु दु ।

चीनय् थ्व भाइरस संक्रमण तच्वया वयेवं थुकिया नियन्त्रणया निंतिं थीथी थासय् कडा नियम लागू यानाहःगु दु । उहान शहरय् वये वने यायेत प्रतिबन्ध तःगु दु । तसकं हुल जुयाच्वंगु अस्पतालय् सैन्य स्वास्थ्य कर्मचारी खटे याःगु दु ।

अथेहे उहान बाहेक मेमेगु शहरय् नं सार्वजनिक स्थलत बन्द याःगु दु । सांघाइ शहरया डिज्नेल्यान्ड व बेइजिङ्ग लिक्कया ग्रेटवालया थीथी ब्व नं बन्द याःगु दु । बेइजिङया अधिकारीतय्सं उहानं वःपिं विरामी जुइमा व स्वस्थ मनू जुइमा, उमित निवाः तक याकःचा तयाः निगरानीइ तयेगु ज्या जुइ । विश्व स्वास्थ्य संगठनं चीनय् न्यनाच्वंगु न्हूगु कोरोनाभाइरस संक्रमणया खतराया स्तर यकिन यायेत व उकिं लायेफुगु विश्वब्यापी जोखिमबारे आः तुरुन्त धाये मफइगु खँ धाःगु दु । डब्ल्युएचओया प्रवक्ता तारिक जसारेभिचं संक्रमणया ल्याः अप्वयेफुगु व उकीया स्पष्ट समाचार मवःनिगु, तर संक्रमणया लक्षण खनेदयेवं उपचार धाःसा यायेफइगु खँ धाःगु दु ।
विश्व स्वास्थ्य संगठनं संक्रमणविरुद्ध चीनं न्ह्याकूगु पहलया प्रशंसा नं याःगु दु ।