सगरमाथा आरोही पत्रकार महर्जनयात हन
थेच्व – थनया थेच्वय् च्वंगु नेवाः इङ्गलिस स्कुलं थःपिनि झिंनिक्वःगु अभिभावक दिवसया लसताय् थुगु सिजनय् सगरामाथा सफल आरोहण यानादीम्ह नेवाः पत्रकार कल्पना महर्जनयात हनेज्या याःगु दु । मूपाहां वाङमय शताब्दी पुरुष डा. सत्यमोहन जोशीं दोसल्लां न्ययेकाः हनेज्या याःगुु उगु ज्याझ्वलय् नेवाः इङ्गलिस स्कुलया न्हूगु भवन नं उलेज्या याःगु खः ।
स्कुलया प्रिन्सिपल नविन थेच्वमिया सभापतित्वय् जूगु उगु ज्याझ्वलय् पाहांपिं गोदावरी नगरपालिकाया मेयर गजेन्द्र महर्जन, गोदावरी नगरपालिका नगर शिक्षा अधिकारी देवीलाल विष्ट, गोदावरी नगरपालिकाया १२ वडा अध्यक्ष जगतबहादुर महर्जन, प्याब्सन यल जिल्लाया नायः शिव कार्की, नेपालभाषा केन्द्रीय विभागया पुलांम्ह प्रमुख तुल्सिलाल महर्जन, सामाजिक अभियान्ता नापं नेवाः वस्ति नेवाः अभियानया संयोजक दिपक तुलाधर, ईलोहं प्रकाशनया दर्शनवीर शाक्य, ३ नं. प्रदेशया प्याब्सन दुजः रामकृष्ण महर्जन, सगरमाथा आरोही नेवाः पत्रकार कल्पना महर्जन, सिक्किमं निसें थःगु मांभाय् सयेकेगु निंतिं थन झायाच्वनादीम्ह निशा प्रधानपिंसं थःथःगु नुगः खँ प्वंकादीगु खः ।
अथे ज्याझ्वलय् पाहां कथं लुमन्ति दबूया न्वकु विजयराज वज्राचार्य, ब्रम्हायणी प्रा.वि.या प्रिन्सिपल अञ्जना जिसी, १२ वडा सदस्य रविन्द्र महर्जन, अडिटर रामगोपाल महर्जन, विद्यालय व्यवस्थापन समितिया नायः कवितादेवी सिंह, दुजःपिं कृष्णकाजी महर्जन, नानीनन्द ग्वाला, अनुपकुमार महर्जन, पूर्ण महर्जन बसन्त माली, काठमाडौं नेवाः किन्डर गार्टेनया प्रिन्सिपल राजेन्द्र महर्जन, नेपालभाषा केन्द्रीय विभागया आंशिक शिक्षक भरत महर्जन व नेपालभाषा टाइम्स न्हिपौया दुजः राजेन्द्र मानन्धर ‘नीलः’पिं झायादीगु खः ।
ज्याझ्वलय् ईलोहं प्रकाशनं बियावयाच्वंगु छात्रवृत्ति निम्ह ब्वँमिपिंत दर्शनवीर शाक्यं लःल्हानादीगु खःसा ज्याझ्वलय् स्कुलया विद्यार्थीपिंसं थीथी न्ह्यइपुगु सांस्कृतिक ज्याझ्वः नं न्ह्यब्वःगु खः ।
LEAVE YOUR COMMENTS