साइबर सुरक्षा कमजोर जूगु धासें थीथी संस्थाय् ‘ह्याक’ यायेगु ख्याच्वः

येँ – मार्च ७ तारिक कुन्हु अनलाइन फुड डेलिभरीया सेवा बियाच्वंगु फुडमान्डुइ साइबर आक्रमण जुल । साइबर आक्रमणया कारणं करिब ५० हजार प्रयोगकर्तातय् व्यक्तिगत विवरण लिक जूगु खः ।

वया लच्छि लिपा अप्रिल ७ तारिकया न्हि कुन्हु मेगू साइबर आक्रमण जुल । थुगुसी आक्रमण नेपाःया छगू तःधंगु इन्टरनेट सेवाप्रदायक कम्पनी भायानेटय् जूगु खः । आक्रमण लिपा अन नं करिब छगू लख ७० हजार प्रयोगकर्तातय् व्यक्तिगत विवरण लिक जूगु खः । प्रयोगकर्तातय् नां, थाय्बाय्, ईमेल आईडी लगायतया व्यत्तिगत विवरण सार्वजनिक जूगु खः ।

भायानेटया सिस्टम ह्याक जूगु स्वन्हु लिपा हे ह्याकरं थःगु ट्वीटर ह्याण्डलं छगू मेगू कम्पनीइ साइबर आक्रमण यायेगु ख्याच्वः बिल । अप्रिल १० तारिक अर्थात शुक्रवाः न्हिनय् ह्याकरं प्रभु मनी ट्रन्सफरया सुरक्षा व्यवस्था कमजोर जूगु धासें भिंकेत ख्याच्वः बिउगु खः ।

ख्याच्वः बिउसें ह्याकरया ‘सतान’ नांया ट्वीटर ह्याण्डलं धाःगु खः, ‘झीसं सचेत यायेगु कोशिस यानागु खः, तर छं छुं हे प्रतिक्रिया मब्यू । यदि सुरक्षा कमजोरी सुधार मजूसा बहनी ८ बजे छन्त चीधंगु डेमो क्यनेगु जुइ ।’

ह्याकरं ख्याच्वः बिउगु कथं शुक्रवाः बहनी ८ बजे प्रभु मनी ट्रन्सफरया साइबर आक्रमण जुल । अले ह्याकरं उकीयात ‘डेमो’ धासें ४१०म्ह मनूतय् नां, थाय्बाय्, मोबाइल नं, ईमेल, आईपी एड्रेस सार्वजनीक यात ।

प्रभुया सिस्टम ह्याक याःगु छुं लिपा प्रमुख प्रतिपक्षी दल नेपाली कांग्रसयात ख्याच्वः बिउगु दु । कांग्रेसयात ग्वाहालि याइपिं व मेमेगू विवरणया डाटा सुरक्षित यायेत धासें यदि मयासा थुकथं हे डाटा लिक यायेगु ख्याच्वः बिउगु दु ।

अथेहे शनिवाः सुथय् ह्याकरं अन्नपूर्ण पोष्टयात ख्याच्वः बिउगु दु । पोष्टया साइटपाखें तसकं संवेदनशीन जानकारी व सोर्स कोड तकं लिक जुयाच्वंगु खँ ह्याकरं थःगु ट्वीटय् न्ह्यथनातःगु दु । थ्व हे कारणं कन्हय्या दिनय् तःधंगु डाटालिक जुइफुगु खँ धाःगु दु ।

थ्वहे दथुइ शनिवाः छगू तसकं कमजोर सुरक्षा व्यवस्था दुगु बैंकया बारे धायेगु खँ ह्याकरं न्ह्यथंगु दु । ह्याकरं उगु बैंकया बारे धायेगु वा ह्याक हे यायेगु तकं जुइफुगु नं ख्याच्वः बिउगु दु ।

थ्वस्वयां न्ह्यः त्रिभुवन विश्वविद्यालय व सिटिईभिटियात न्ह्यथंसें अनया कर्मचारीतय् जानकारी फुक्कसिया निंतिं सार्वजनिक मयायेत इनाप याःगु खः ।

ह्याकर सु खः व वया उद्देश्य छु खः धाइगु अझ सुनां मसिउनी । नेपाल प्रहरीया साइबर ब्यूरों थुकीया बारे अनुसन्धान न्ह्याकाच्वंगु दु । तर अझ नं सुयातं ज्वनेफुगु धाःसा मदुनी । ह्याकरं धाःसां ट्वीट मार्फत नेपाःया साइबर सुरक्षा कमजोर जूगु धासें थःम्हं छुं मखुगु ज्या यायेगु योजना मदुगु खँ न्ह्यथंगु दु । नापं ‘सतानं’ आः हिउपाःया ई जूगु व भ्रष्टतय् भण्डाफोर जुइमाःगु धाःगु दु ।