विन्ध्यवासिनी कंसाकार सु खः?

येँ(नेपालभाषा टाइम्स)- राष्ट्रिय स्वतन्त्र पार्टीं थः सांसद डा. ढाका कुमार श्रेष्ठ पदं बर्खास्त जुइवं वय्कःया थासय् मकवानपुरया मय्जु विन्ध्यावासिनी कंसाकारयात सांसद दयेकेगु निर्णय याःगु दु । थ्व निर्णयया नापनापं विन्ध्यवासिनी नं नेपाःया राजनीतिइ चर्चाय् वःगु दु ।

रास्वपां ढाकाकुमारया पद वनेवं नेवाःया पलेसा नेवाः हे धकाः समानुपातिकया जनजाति कोटां विन्ध्यवासिनी कंसाकारया नां न्ह्यःने हःगु खनेदु । तर वय्कः ‘कंसाकार’ धकाः च्वयेगु याःसां नेवाः कंसाकार (कसाः) धाःसा मखु । वय्कः भारतीय मूलयाम्ह कंशकार खः । हेटौंडाय् वय्कःया बौपिनि भुतू ज्वलं सम्बन्धी पसः दु । जनजाति कोटां वय्कःया नां हःगु खँय् रास्वपाय् विवाद नं पिहां वःगु खँ सीदुगु दु ।

थनिं झिदँ न्ह्यः वय्कः एसिड आक्रमणया शिकार जुयादीगु खः । थःगु पसलय् च्वनाच्वंम्ह वय्कःयात छम्ह मिजनं थःलिसे इहिपा यायेत अस्वीकार यात धकाः एसिडं छ्वाका थकूगु खः । एसिड छ्वाकूम्ह मिजं भारतीय खःसा घटना लिपा नं व खुदँ तक भारतय् सुलाच्वंगु खः । लिपा रवि लामिछानेया हे कुतलं वयात ज्वने फुगु खः । अनं लिपा विन्ध्यवासिनी लामिछानेलिसे सम्पर्कय् वःगु खः ।

एसिड आक्रमणय् लानाः ख्वाः स्यंसां वय्कः निराश मजुसे समाजसेवाया ज्याय् निरन्तर रुपं सक्रिय जुया च्वनादीगु खः ।