ओली विरुद्ध ल्वायेत रावल दन

येँ – नेकपा (एमाले)या उपाध्यक्ष भीम रावलं पार्टीया झिक्वःगु महाधिवेशनय् अध्यक्ष पदय् उम्मेदवारी बीगु घोषणा यानादीगु दु । वय्कःया थ्व उम्मेदवारीं यानाः पार्टी अध्यक्ष केपी ओलीयात थुगुसी निर्विरोध निर्वाचित यायेगु ग्वसाः ताःलाइगु सम्भावना मदया वंगु खँ धाःगु दु ।

नेता रावलं म्हिगः छगू पत्रकार सम्मेलन हे यानाः अध्यक्ष पदय् उम्मेदवारी बीगु घोषणा यानादीगु खः । नेता रावलं पार्टी अध्यक्ष ओलीयात आः हानं अध्यक्ष पदय् दावी मयासे थःत अध्यक्ष जुइगु लागिं समर्थन यायेत नं इनाप यानादीगु दु । अध्यक्ष ओलीं पार्टीया अध्यक्ष व प्रधानमन्त्री जुयाः याये माक्व ज्या यायेधुंकूगु जूगुलिं आः नेतृत्व हस्तान्तरण यायेमाःगु बिचाः नं तयादीगु खः । अध्यक्ष ओलीं न्हापा नं आः थः हानं अध्यक्ष जुइ मखुत, न्हूगु पुस्तायात नेतृत्व हस्तान्तरण यायेगु जुइ धकाः धयादीगु कारणं उगु धापूयात सार्थक यायेगु लागिं रावलं इनाप यानादीगु दु । वय्कलं ओलीयात उमेर व स्वास्थ्यया ल्याखं नं अवकाश कायेमाःगु सुझाव बियादीगु खः ।

वय्कलं ओलीं आः थःत पत्याः यानाः न्हूगु पुस्तायात पार्टी हस्तान्तरण यायेमाःगु माग यासें वय्कलं न्हूगु पुस्ता मार्फत आः ओलीं थःगु बिचाः व कार्यक्रम कार्यान्वयन याना वनेमाःगु बिचाः तयादीगु खः ।
नेता रावलं पार्टी कार्यालयय् हे च्वनाः थःगु उम्मेदवारी घोषणा यायेगु तयारी यानादीगु खःसां पार्टीया महासचिव ईश्वर पोखरेलं थाय् बी फइ मखु धाःगुलिं पिहां वयाः पत्रकार सम्मेलन यायेमाःगु धासें उकी दुःख नं प्वंकादिल । वय्कलं अध्यक्ष पदय् थः याकःचा ल्वायेत्यनागु धासें थःगु छुं प्यानल मदुगु खँ नं स्पष्ट यानादिल ।

रावल मेम्ह ‘राजनीतिक जोकर’
ओली विरुद्ध उम्मेदवारी बीगु थ्व घोषणाया नापनापं पार्टी उपाध्यक्ष भीम रावल आः एमाले दुने थनं हे थाय् मदुम्ह ‘राजनीतिक जोकर’ साबित जुइगु लँय् थ्यंगु टिप्पणी एमाले दुने याना हःगु दु । विचार व विवेक स्वयां नं आवेश व आक्रोशया भरय् निर्णय याइम्ह नेता रावलं थ्व स्वयां न्ह्यः ओलीयात न्हापा थःपिंलिसे याःगु १० बुँदे सहमति कार्यान्वयन या धकाः इनाप याःगु खःसा ओलीं उकियात चाःहिकाः अस्वीकार यानाबीधुंकूगु दु ।

माधव नेपालया क्याम्प त्वःताः एमालेय् वल धाःसा पद दइ धकाः आशा यानादीम्ह वय्कःयात अन छुं जिम्मेवारी बिउगु मदुनि । न्हापा घुर्की क्यनाः पद ल्हातय् लाकीम्ह वय्कःयात आः छुं पद बीगु सम्भावना मदु । थुकिं यानाः आः वय्कःया माधव नेपाल क्याम्पया नापनापं ओली क्याम्पय् नं थाय् मदइगु जुयाः वय्कःया राजनीतिक भविष्य हे आः अन्त्यपाखे वनाच्वंगु खँ धयाहःगु दु ।

सम्बन्धित बुखँ

LEAVE YOUR COMMENTS