बोको हरामं ५० म्ह मस्त अपहरण यात

नाइजेरियाय् विद्रोही पुचः बोको हरामं छगू गांया स्कुलं ५० म्ह मस्तय्त अपहरण याःगु दु । थःपिनिगु पुचलय् जबर्जस्ती लडाकु दयेकेगु निंतिं बोको हरामं थथे इलय्ब्यलय् मस्तय्त अपहरण यायेगु यानाच्वंगु दु । संयुक्त राष्ट्र संघ बालकोष –युनिसेफ)या कथं सन् २०१३ निसें उत्तरपूर्वी नाइजेरियाय् जक द्वःछिं मल्याक मस्तय्त थुकथं अपहरण यायेधुंकूगु दु ।

नाइजेरियाया प्रहरीं आः अपहरण यानायंकूपिं मस्तय्त मालेगु ज्या न्ह्यायेधुंकूगु खँ धाःगु दु । गृह मन्त्रालयं मस्त मालेगु निंतिं तःधंगु ल्याखय् सुरक्षाकर्मी परिचालन यानागु खँ धाःगु दु ।बोको हरामं युद्ध सुरु याःगु थ्यंमथ्यं गदँया दुने उमिसं झिंनिसलं मल्याक स्कुलय् आक्रमण यायेधुंकूगु दु ।

बोको हरामया आक्रमणय् लानाः निद्वः व २९४ म्ह शिक्षकत सीधुंकूगु खँ युनिसेफ धाःगु दु । सन् २०१४ य् नं बोको हरामं २७६ म्ह मस्तय्त अपहरण याःगु खः । उबलय् नं सरकार मस्तय्त मुक्त यायेत असफल जूगु खः । बोको हरामं अपहरण यानायंकूपिं मस्तय्त जबर्जस्ती थःपिनि लडाकु सेनाय् भर्ती यायेगु, यौन शोषण यायेगु यानाच्वंगु दु ।