ई पासपोर्ट आपूर्तिया निंतिं साउन ३ तक म्याद
येँ (नेपालभाषा टाइम्स) – सरकारं विद्युतीय पासपोर्ट आपूर्तिया निंतिं वइगु साउन ३ गते तक पीगु जूगु दु । प्रधानमन्त्री कार्यालय व परराष्ट्र मन्त्रालय दथुइ जर्मन कम्पनीं क्वःछिनातःगु इलय् ई–पासपोर्ट उपलब्ध याके फइगु खः कि मखु धइगु बारे मतभेद जुयाच्वंगु दु । अथेखःसां सरकारं जर्मन कम्पनीयात राहदानी आपूर्तिया निंतिं साउन ३ गते तकया म्याद बिउगु दु ।
राहदानी विभागं सन् २०२५ जुन ६ तारिख कुन्हु निगू जर्मन कम्पनी भेरोडोस जीएमबीएच व म्युहलबाउरयात पासपोर्टया ठेक्का बिउगु खः । सम्झौता कथं गुलाया दुने कार्यान्वयन तयारी यानाः २०२६ मार्च निसें न्हूगु राहदानी इनेगु ज्या न्ह्याकेगु व न्यादँ तक सञ्चालन यायेगु व्यवस्था यानातःगु खः । तर जर्मन कम्पनीं क्वःछिनातःगु इलय् राहदानी इनेगु ज्या मयायेवं सरकारं साउन ३ गते तकया ई थप याःगु खः ।
थुकिया दथुइ राहदानीया मौज्दातम्हो जूगु व क्वःछिनातःगु इलय् आपूर्ति निश्चित मजूगु धासें प्रधानमन्त्री कार्यालयं चिउताः प्वंकेगु ज्या जूगु खँ धाःगु दु । प्रधानमन्त्री कार्यालयया सचिवालयं इलय् ज्या क्वमचाःगु धासें ठेक्का सम्झौता रद्द यायेत राहदानी विभागयात निर्देशन बिउगु खः । तर लिपांगु इलय् वयाः ठेक्का सम्झौता रद्द यात धाःसा ठेकेदार कम्पनी मध्यस्थताया निंतिं कानुनी लँपुइ वनेफइगु सम्भावना खनेवं सरकारं साउन ३ गते तकया ई थप यायेत बाध्य जूगु खँ सूत्रं धाःगु दु ।
पासपोर्ट छापे याइगु जर्मन कम्पनीयात कयाः प्रधानमन्त्री कार्यालय व मन्त्रालय दथुइ विवाद दुसां नं निगुलिं पक्ष साउन ३ गते तक म्याद बीत तयार जूगु खः । परराष्ट्र मन्त्रालय जर्मन कम्पनीं इलय् पासपोर्ट छापे याइगु खँय् विश्वस्त दुसा प्रधानमन्त्री कार्यालयया सचिवालयया दुजःपिंसं धाःसा जर्मन कम्पनीं इलय् पासपोर्ट छापे याइगु खँय् आशंका प्वंकाच्वंगु दु ।
तर परराष्ट्र मन्त्री शिशिर खनाल–लगायत मन्त्रालयया उच्च अधिकारीत लिसे राहदानी विभागया प्राविधिक पुचः धाःसा जर्मन कम्पनीइ क्वःछिनातःगु इलय् राहदानी उपलब्ध याकीगु खँय् विश्वस्त दुगु खँ धाःगु दु । परराष्ट्र मन्त्री खनालं राहदानी विभागय् जानकारी कायेगु ज्या निरन्तर रुपं यानाच्वंगु दु । तर प्रधानमन्त्री कार्यालयं धाःसा ठेक्का रद्द यानाः न्हापा पासपोर्ट छापे याःगु फ्रान्सया कम्पनीयात हे ठेक्का बीत दबाब बियाच्वंगु खँ पिहां वयाच्वंगु दु । आः वयाः परराष्ट्र मन्त्री खनालं हे ठेक्का त्वाःथलेगु ज्या गलत जुइगु व थुकिं अन्तर्राष्ट्रिय क्षेत्रय् नेपाःयात बांमलाःगु लिच्वः लाइगु खँ धायेवं प्रधानमन्त्री सचिवालया पदाधिकारीत साउन तक पीत तयार जूगु खँ सीदुगु दु ।
LEAVE YOUR COMMENTS