नाभाल्नीया म्हय् कडा विष प्रयोग

एजेन्सी – रुसया विपक्षी नेता अलेक्सी नाभाल्नीया म्हय् कडा स्नायु विष प्रयोग जूगु पुष्टि याःगु दु। विपक्षी नेता नाभाल्नीं थःगु म्हय् सोभियतकालीन इलय् प्रयोग जूगु कडा प्रकारया स्नायु विष ‘नोभिचोक’ प्रयोग जूगु पुष्टि जूगु धाःगु दु ।

कोमापाखें सामान्य अवस्थाय् लिहां वयेधुंकाः न्हापांगु सार्वजनिक टिप्पणी यायेगु झ्वलये नाभाल्नीं उगु प्रतिक्रिया बिउगु खः । पश्चिमी प्रयोगशालाय् याःगु परीक्षणया इलय् थःगु म्हय् उकथंया स्नायुविषया प्रयोग जूगु नाभाल्नीं धाःगु दु। थःगु म्हय् ‘नोभिचोक’ स्नायु एजेन्ट दुगु संकेत यासें रुसी विपक्षी नेताः नाभाल्नीं थ्व सम्बन्धय् थप अनुसन्धान यायेत थःगु लं लित बीत रुसी सरकार समक्ष माग नं याःगु दु ।

जर्मनीया बर्लिनस्थित छगू अस्पतालय् उपचार लिपा स्वास्थ्य लाभ याकाच्वंम्ह नाभाल्नी वंगु अगस्ट २० य् साइबेरियां मस्कोया निंतिं वनाच्वंगु इलय् म्हं मफयेवं विमान दथुइ हे अवतरण यानाः अस्पताल भर्ना याःगु खः । वयात जर्मनी यंके न्ह्यः निन्हुतक रुसया हे छगू अस्पतालय् तयाः वासः याकातःगु खः ।

नाभाल्नीं फ्रान्स व स्वीडेनया निगू स्वतन्त्र प्रयोगशाला व बुन्डे श्वेहरर्सया विशेष प्रयोगशालाय् थःगु म्हया परीक्षण याःगु इलय् विष दुगु पुष्टि जूगु खँ धाःगु दु ।