क्रिकेट मैदानय् जूगु आक्रमणयात कयाः संरासंपाखें निन्दा

संयुक्त राष्ट्र संघं पूर्वी अफगानिस्तानय् च्वंगु छगू क्रिकेट मैदानय् जूगु आक्रमणया निन्दा याःगु दु । संरासंया महासचिव एन्टोनियो गुथ्रेसं घटनाया निन्दा यासें छगू वक्तव्य पिथनादीगु खः । आम जनतायात लक्षित यानाः जूगु थ्व आक्रमण मानवअधिकार व अन्तर्राष्ट्रिय कानुन विपरित जूगु खँ गुथ्रेसया वक्तव्यय् धयातःगु दु ।

मुस्मां धर्मावलम्बीतय् लछियंकंया रमजान पर्वया लसताय् स्थानीय स्तरय् क्रिकेट धेंधेंबल्लाः जुयाच्वंगु इलय् शुक्रवाः क्रिकेट मैदानय् विस्फोट जूगु खः । थ्व विस्फोटय् लानाः च्याम्ह सीगु खःसा ५५ म्ह घाःपाः जूगु खः ।