लुम्बिनीइ भुटानी गुम्बाया शिलान्यास

येँ (नेपालभाषा टाइम्स) – भगवान गौतम बुद्धया जन्मस्थल लुम्बिनीइ भुटानी गुम्बा निर्माण याइगु जूगु दु । पवित्र लुम्बिनीइ भुटान सरकारं दयेकेत्यंगु भुटानी गुम्बाया छगू औपचारिक ज्याझ्वःया दथुइ शिलान्यास याःगु दु ।

भुटानया गृहमन्त्री ल्योन्पे छिरिङ, भूटानया धर्मगुरुलिसें उप महासंघराजा दोर्जे लोपेन रिम्पोछे, नेपाल सरकारया संस्कृति, पर्यटन व नागरिक उड्डयनमन्त्री खडकराज पौडेल (गणेश)या उपस्थितिइ धार्मिक विधिकथं पुजा यानाः गुम्बा निर्माणया शिलान्यास याःगु खः । उगु इलय् भुटानी लामागुरुपिंसं धार्मिक अनुष्ठान यासें भूमि पुजा नं याःगु खः ।

गुम्बा निर्माणया निंतिं भुटान सरकार व लुम्बिनी विकास कोष दथुइ थगुने छगू समझदारी पती (एमओयु) ल्हाःचिं तयेगु ज्या जूगु खः । उगु सम्झौताकथं चालु आर्थिक दँया दुने परियोजना शुरु यायेगु प्रतिवद्धता कार्यान्वयन यानाः निर्माण प्रक्रिया न्ह्याकेगु खँ दुथ्याकातःगु खः ।

परियोजना अन्तर्गत न्हापांगु चरणय् गुम्बा निर्माण जुइगु थासय् पःखाः ग्वयेगु ज्या क्वचायेधुंकूगु दुसा आः मुख्य देगः (गुम्बा) निर्माणया ज्या शुरु जूगु दु । भुटान सरकारं वइगु निदँया दुने गुम्बा निर्माणया सकतां ज्या क्वचायेकेगु लक्ष्य कयातःगु दु ।

गुम्बा निर्माणयात नेपाः व भुटानया दथुइ सांस्कृतिक, धार्मिक व कूटनीतिक स्वापूयात अझ क्वातुका यंकेगु निंतिं छगू ऐतिहासिक पलाःया रुपय् काःगु दु ।