ने. सं. ११४६ तछलागा पारू -

जेनजी आन्दोलनया प्रतिवेदन अध्ययन समितिया निष्कर्ष : ‘प्रहरीं आँटे चायाः गोली कयेकूगु खनेदु’

येँ (नेपालभाषा टाइम्स) – जेनजी आन्दोलनया झ्वलय् आँटे चायाः सुरक्षाकर्मीतय्‌सं गोली कयेकूगु निष्कर्ष पिकाःगु दु । जेनजी आन्दोलनय्‌ सुरक्षाकर्मीया भूमिकायात कयाः गौरीबहादुर कार्की नेतृत्वया जाँचबुझ आयोगं याःगु सिफारिस अध्ययन समितिं उगु निष्कर्ष पिकाःगु खः ।

अध्ययन समितिया छम्ह दुजःया कथं संसद भवन दुहां वनेत्यंपिं जेनजी प्रदर्शनकारीयात प्रहरीं नियन्त्रणय् कायेत स्वःगु इलय् प्रदर्शनकारीतय् ल्याः आकाझाकां अप्वयेवं परिस्थिति नियन्त्रणं पिहांवंगु निष्कर्ष नं पिकाःगु दु । आः अध्ययन समितिं थःगु अध्ययन क्वचायेकाः प्रतिवेदन च्वयेगु ज्या न्ह्याकाच्वंगु दु ।

मन्त्रिपरिषदं सुरक्षा निकायया प्रमुख व कमान्डरयात याःगु कारबाहीया सिफारिस अध्ययन यायेत उच्च अदालतया पुलांम्ह न्यायाधीश प्रेमराज कार्कीया नेतृत्वय् सशस्त्र प्रहरीया पुलांम्ह एआईजी सुबोध अधिकारी व नेपाल प्रहरीया पुलांम्ह एआईजी टेकप्रसाद राई दुथ्याःगु समिति नीस्वंगु खः ।

अध्ययन समितिं प्रहरीं बल छ्यलेगु झ्वलय् प्रदर्शनकारीत छक्वलं अप्वयेवं सुरक्षाकर्मी आँटे चाःगु निष्कर्ष पिकाःगु खः । बानेश्वरय् सुरक्षाकर्मी आँटे चायेवं गोली कयेकूगु खनेदुुगु खँ समितिया छम्ह दुजलं कनादीगु दु ।

तःधंगु ल्याखय् दुपिं जेनजी पुस्तां संसद भवन घेरे यायेधुंकाः फिल्डय् दुपिं सुरक्षाकर्मीतय्‌सं न्हापां सम्झे यायेगु कुतः याःगु खनेदुगु धासें समितिया छम्ह दुजलं धयादिल, ‘बन्दुक ज्वनातःपिं सुरक्षाकर्मीतय्सं आन्दोलनकारीतय्त ल्हाः जोरे यानाः सम्झे याःगु खनेदु, तर आन्दोलनकारी अझ न्ह्याः वनेवं गोली कयेकूगु खनेदु ।’

एम्बुलेन्स व गाडीइ मि तयेधुंकाः सुरक्षाकर्मीं गोली कयेकूगु निष्कर्ष नं समितिं पिकाःगु दु । प्रमाण अवलोकन व सरोकारवाला अधिकारीत लिसे सहलह यानाः जाँचबुझ प्रतिवेदन अध्ययन यायेगु ज्या जूगु खँ संयोजक प्रेमराज कार्कीं कनादीगु दु । वय्‌कलं धयादिल, ‘प्रमाण स्वयेगु लिसें सम्बन्धित सुरक्षाकर्मीत लिसे सहलह यायेगु ज्या जूगु दु ।’

सरोकारवाला लिसे सहलह यायेगु झ्वलय् व घटनास्थलया विवरण स्वयेबलय् सुरक्षा निकाययाके माक्व साधन स्रोतया अभाव जूगु निष्कर्ष नं समितिं पिकाःगु दु । समितिया कथं झिदँ न्ह्यवंनिसें प्रहरीया निंतिं भिड नियन्त्रण यायेगु सामान न्यायेगु ज्या जुयाच्वंगु मदु । उकथं हे भिड नियन्त्रण यायेगु निंतिं सुरक्षाकर्मीतय्सं छु छु ज्या यात धइगु पूवंक विवरण स्वयागु धासें वय्‌कलं धयादिल, ‘साधन स्रोतया अभाव जूगु खँ सम्बन्धित व्यक्तितय्सं धाःगु दु । अध्ययन समितिं उकथं हे सिफारिस याइ ।’

समितिया म्याद थ्वहे असार २२ गते क्वचायेत्यंगु दु । म्याद दुने हे प्रतिवेदन लःल्हायेगु कथं च्वयेगु ज्या जुयाच्वंगु खँ नं संयोजक कार्कीं कनादीगु दु ।

जाँचबुझ आयोगं केन्द्रीय् सुरक्षा समितिया पदाधिकारी व येँ जिल्लाया तत्कालीन सीडीओ छवि रिजालयात फौजदारी मुद्दा न्ह्याकेत सिफारिस याःगु खः । उकथं हे आयोगं सेनाया छुं अधिकृततय्त विभागीय कारबाही यायेत सिफारिस याःगु खः । उकियात कयाः अध्ययन समितिं छु गज्याःगु राय बीगु धइगु बारे सहलह जुयाच्वंगु खँ नं धाःगु दु ।

जेनजी प्रदर्शनयात कयाः जाँचबुझ यायेत नीस्वंगु आयोगं तत्कालीन आईजीपी चन्द्र कुवेर खापुङ, सशस्त्रया आईजी राजु अधिकारी व राष्ट्रिय अनुसन्धान विभागया प्रमुख हुतराज थपायात फौजदारी कसुरय् अनुसन्धान यायेत सिफारिस याःगु खः ।