ने. सं. ११४४ कौलाथ्व दुतिया -

चीनया न्हूगु नक्साय् भारतया अरुणाचल प्रदेश

एजेन्सी- चीनं सार्वजनिक याःगु न्हूगु नक्साय् भारतया अरुणाञ्चल प्रदेशयात थःपिनिगु भू–भागय् लाकूगु दु । नक्साय् भारत व चीनया सीमा लाःगु विवादित लागा अक्साइ चिनयात नं चीनं थःपिनिगु नक्साय् दुथ्याकूगु दु । नक्साय् ताइवान व साउथ चाइना सीयात नं चीन थःपिनिगु देय्या भूभाग कथं क्यनातःगु दु ।

चिनियाँ पार्टीं न्ह्याका वयाच्वंगु धयातःगु अंग्रेजी पत्रिका ‘ग्लोबल टाइम्सं’ सामाजिक सञ्जालय् च्वगु दु, ‘ चीनं २०२३ या प्रचलित नक्सा सोमवाः सार्वजनिक याःगु दु । थ्व नक्सा प्राकृतिक संसाधन मन्त्रालयया वेबसाइटय् सार्वजनिक जूगु खः । थ्व नक्सा चीन व विश्वया मेमेगु देशया ड्रइङ विधिया आधारय् दयेकूगु खः ।’

भारतीय प्रधानमन्त्री नरेन्द्र मोदी व चीनया राष्ट्रपति सी जिनपिङया दथुइ ब्रिक्स सम्मेलनय् वार्ता जूगु छुं न्हि लिपा हे चीनया न्हूगु नक्सा सार्वजनिक जूगु दु । वार्ताय् निम्हेसिया दथुइ सीमा विवादयात कयाः खँल्हाबल्हा जूगु खः ।

सन् २०२३ अप्रिलय् चीनं अरुणाञ्चल प्रदेशया ११ गू थाय्या नां हिलेगु निंतिं अनुमोदन याःगु खःसा भारतं थुकियात अस्वीकार याःगु भारतीय सञ्चार माध्यमतय्सं धाःगु दु । चीनं अरुणाञ्चल प्रदेशया ९० हजार वर्गकिलोमिटर भाग थःपिनिगु जूगु धयावयाच्वंगु दु । थुखे भारतं अक्साइ चीनया ३८ द्वः वर्गकिलोमिटर लागा चीनं कब्जाय् काःगु द्वपं बियावयाच्वंगु दु ।

भारत व चीनया दथुइ वंगु स्वदँ न्ह्यवनिसें सीमायात कयाः विवाद तच्वया वयाच्वंगु दु, गुकिं यानाः निगू देय् दथुइया स्वापू नं स्यनाच्वंगु दु । सीमा विवादयात कया निगू देय् दथुइ तःक्वः हे वार्ता नं जुइधुंकूगु दु ।