त्रिवियात स्ववियुया ध्यानकर्षण पौ

येँ (नेपालभाषा टाइम्स) – येँया गुंगू क्याम्पसया स्वतन्त्र विद्यार्थी युनियन (स्ववियु) या सभापतितय्सं दलीय विद्यार्थी संगठन चीकेत बिउगु पौयात कयाः त्रिभुवन विश्वविद्यालयया पदाधिकारीतय्‌त ध्यानाकर्षण याकूगु दु । विद्यार्थीतय्‌सं त्रिविया निमित्त उपकुलपति प्रा.डा. सुशील वज्राचार्य सहित पदाधिकारीतय्त नापलानाः त्रिवि विद्यार्थी कल्याण तथा खेलकुद निर्देशनालयं दलीय विद्यार्थी संगठनया संरचना चीकेत याःगु पत्राचारप्रति ध्यानकर्षण याकूगु खः ।

ध्यानाकर्षण पतिइ धयातःगु दु, ‘थुगु पलाः वर्तमान सरकारया अज्ञानताया पराकाष्ठ खः । विश्वविद्यालय ज्ञानया भण्डार व विचार-विमर्श जुइगु प्राज्ञिक थाय् खः । थनया वर्तमान पदाधिकारीतय्‌सं सरकारयात विश्वविद्यालयय् दलीय संरचना मदुगु यथार्थ जानकारी याके मफुगुलिं विश्वविद्यालय आः स्वायत्त मजुल धयागु स्पष्ट जुल । प्राज्ञिक स्वतन्त्रता व प्रशासनिक स्वायत्तता विश्वविद्यालयया निगू मू आधार स्तम्भ जुइमाःथाय् लिपांगु इलय् विश्वविद्यालय सरकारया किचः जूवंगुलिं जिमिसं गम्भीर खेद प्वंकाच्वना ।’

उच्च शिक्षाया बेथिति अन्त्यया निंतिं विश्वविद्यालयया कुलपति प्रधानमन्त्री जुइगु व्यवस्था अन्त्य जुइमाःगु माग नं उमिसं याःगु दु । ध्यानाकर्षण पतिइ स्ववियुया संरचना चीकेगु निर्णय प्रधानमन्त्रीया प्रत्यक्ष नियन्त्रण व हस्तक्षेपया सन्देशया रुपय् थःपिंसं कयागु खँ नं न्ह्यथनातःगु दु । विश्वविद्यालयय् नेपाल विद्यार्थी संघ, अनेरास्ववियु व अखिल (क्रान्तिकारी) लगायतया संगठनया गुगुं नं भौतिक संरचना मदुगु खँ नं ध्यानाकर्षण पतिइ न्ह्यथनातःगु दु ।