छत्रपाटी चिकित्सालयय् जर्मन ग्वाहालिया २५ दँ

येँ छत्रपाटी चिकित्सालययात जर्मन ग्वाहालि सुरु जूगु २५ दँ क्यंगु लसता मंगलवाः छगू ज्याझ्वः यासें हन । ज्याझ्वलय् चिकित्सालययात निरन्तर ग्वाहालि याना वयाच्वनादीम्ह जर्मन डा. अकिम हफम्यानयात ख्येँ सगं बियाः हनेज्या नं याःगु खः । चिकित्सालयया अध्यक्ष विजयबहादुर मालीं डा. हफम्यानयात हनापौ देछायादीगु खःसा मूपाहाँ रक्षामन्त्री भिमसेनदास प्रधानं लुमन्ति चिं देछायादीगु खः । अथेहे डा. हफम्यानया जहान मय्जु लुइसा हफम्यानयात चिकित्सालयया उपाध्यक्ष विद्या बनमालीं दोसल्लां न्ययेकाः हनादीगु खः ।

चिकित्सालयया सह कोषाध्यक्ष योगेन्द्रमान श्रेष्ठं हफम्यानयात लःल्हाःगु हनापौ ब्वनाः न्यंकादीगु खः । ज्याझ्वलय् न्ववानादिसें चिकित्सालयया अध्यक्ष मालीं जर्मन ग्वाहालिया कारणं यानाः हे छत्रपाटी चिकित्सालय पोलिक्लिनिक पाखें थांै अस्पतालया रुपय् धस्वायेफुगु खँ न्ह्यथनादिसें जर्मनीया जेनाय् च्वंगु एशोसियसन फर मेडिकल टेक्निकल को–अपरेशन व डा. हफम्यानयात सुभाय् देछायादीगु खः । डा. हफम्यानया हे कुतलं चिकित्सालयय् थीथी आधुनिक उपकरणत हयेफुगु, चिकित्सालयपाखें वाया चिकित्सकतय्त जर्मनय् प्रशिक्षणया निंतिं छ्वयेफुगु खँ लुमंकूगु खः ।

अथेहे निदँ न्ह्यव वःगु तःभुखाचं पीडितपिंत ग्वाहालि यायेत, भुखाचय् पाखें सुरक्षित जुइगु निंतिं चिकित्सालयया भवन रेट्रो फिटिङ यायेत नं हफम्यानपाखें ग्वाहालि हयाबिउगु खँ अध्यक्ष मालीं लुमंकादीगु खः । डा. हफम्यानयात सुभाय् देछायादिसें वय्कलं धयादीगु दु, ‘सच्चाम्ह पासा व खः, गुम्हेसिनं समस्याया इलय् ग्वाहालि याइ । डा. हफम्यान नं चिकित्सालयया धाथेंया सच्चाम्ह पासा खः ।’ज्याझ्वलय् न्ववानादिसें वय्कलं थुकथं हे जर्मन ग्वाहालि निरन्तर जुयाच्वनीगु आशा प्वंकादिसें थथे हे न्यय्दँ नं हनेखनीगु विश्वास प्वंकादिल ।

अथेहे मूपाहाँ रक्षामन्त्री भिमसेनदास प्रधानं नं जर्मन ग्वाहालि व डा. हफम्यानयात सुभाय् देछायादिसें सरकारपाखें नं चिकित्सालययात ग्वाहालि बीगु निंतिं कुतः यानाच्वनागु खँ कनादिल । अथेहे सम्मानित डा. हफम्यानं प्रजातन्त्र वयेधुंकाः ९०या दशकय् नेपाः सरकार व जर्मन विकास कर्पोरेशन (जिटिजेड) दथुइ ग्वाहालिया निंतिं सम्झौता जुइधुंकाः सन् १९९२ निसें चिकित्सालययात ग्वाहालि याना वयाच्वनागु खँ लुमंकादिसें लिपा थ्यंक थज्याःगु ग्वाहालि बियाच्वनेगु निंतिं थःम्ह ज्या यायेगु खँ धयादिल । उपाध्यक्ष बनमालीं सुभाय् देछायादिसें चिकित्सालय् आइसियु, अपरेशन थिएटर आदि दयेकेत नकतिनि हे जक वःगु जर्मन ग्वाहालियात न्ह्यथनादिसें थुकिया निंतिं नं यक्व यक्व सुभाय् देछायादीगु खः ।