ग्याँसया भाः थहां वन, पेट्रोलया भाः कुहां वल

येँ – नेपाल आयल निगमं सोमवाः चान्हय् १२ बजे निसें लागू जुइकथं पेट्रोलियम पदार्थया भाः क्वकाःगु दुसा जा थुइगु ग्याँसया भाः धाःसा थकाःगु दु । निगमं जारी याःगु न्हूगु मूल्यसूची कथं पेट्रोल, डिजेल व मचिकंया भाः लितरं छतका क्वकाःगु खः । आः पेट्रोल प्रतिलिटर ११० तका, डिजल व मचिकं लिटरं ९९ तका कायम जूगु दु ।

उकथं हे ग्यासया भाः धाःसा थहां वंगु दु । ग्यासया भाः प्रति सिलिन्डर २५ तका थकयाः आः १३७५ तका थ्यंकूगु दु । हवाई इन्धनया भाः धाःसा थकाःगु मदु । अमेरिका व इरान दथुइ तनाव अप्वयेवं विश्व बजारय् चिकंया भाः थहां कुहां जुयाच्वंगु खः । थ्वहे कारणं यानाः बजारय् लुँया भाः नं थहां कुहां वयाच्वंगु दु ।