थिमिइ कम्पोस्ट साः दयेकीगु केन्द्र

थिमि – थिमि नगरपालिकाय् कम्पोष्ट साः दयेकीगु केन्द्र चायेकूगु दु । थिमि नपा वडा नं. ४ य् लाःगु विष्णु कुण्डलय् थ्व केन्द्र चायेकूगु खः । जापानी प्रविधिं फोहर व्यवस्थापन यानाः कम्पोस्ट साः दयेकीगु थ्व केन्द्र प्रदेश नं. ३ या सभामुख सानुकुमार श्रेष्ठं सोमवाः उलेज्या यानादीगु दु ।सभामुख श्रेष्ठ थ्व केन्द्रयात नमूनाया रुपय् विकास यायेगु व थ्व परियोजना सफल जुल धाःसा प्रदेशया फुक्कं स्थानीय तहय् संचालन याना यंकेगु खँ धयादीगु दु ।

ज्याझ्वलय् न्ववानादिसें प्रदेश नं. ३ या सांसद डा. राजेन्द्रमान श्रेष्ठं छेँय्छेँय् नं पिहां वइगु फोहरयात मोहरय् परिणत यायेत नगरपालिका सक्रिय जुइमाः धयादिल । मध्यपुर थिमि नगरपालिकाया प्रमुख मदनसुन्दर श्रेष्ठं ४ वडाय् नमूना कथं दयेकूगु प्रविधि विस्तार यानाः थिमिया फुक्क वडाय् थज्याःगु केन्द्र दयेकेगु खँ कनादिल ।

केन्द्रया निंतिं थिमि नगरपालिकां निगू करोड लगानी याःगु व प्रदेश सरकारपाखें ५० लाख तका अनुदान वइगु खँ न्ह्यथँसें वय्कलं थौंकन्हय् फोहर मुनेत छेँय्छेँय् बाल्टिन वितरण यानागु खँ कनादिल ।