माथिल्लो त्रिशुली ए व कुलेखानी तेस्रा अन्तिम चरणय्
येँ – नेपाल विद्युत प्राधिकरणं दयेकाच्वंगु ६० मेगावाटया माथिल्लो त्रिशुली थ्री ए व १४ मेगावाटया कुलेखानी तेस्रो जलविद्युत आयोजना लिपांगु चरणय् थ्यंगु दु । कुलेखानी तेस्रोया ४.२ किलोमिटर मू सुरुङय् लः तयाः परीक्षण यायेगु ज्या क्वचायेधुंकूगु दुसा त्रिशुली थ्री एया ५ किलोमिटर मू सुरुङय् म्हिगः लः तयाः परीक्षण शुरु जूगु खँ प्राधिकरणया कार्यकारी निर्देशक कुलमान घिसिङं जानकारी बियादीगु दु ।
कार्यकारी अधिकृत घिसिङं धयादीगु दु, ‘कुलेखानी तेस्रोया मू सुरुङया परीक्षण क्वचायाः लः जायेका तयागु दु, थ्व आयोजनाया महत्वपूर्ण माइलस्टोन खः, विद्युत गृहया टर्वाइन, जेनेरेटर लगायतया इलेक्ट्रो मेकानिकल उपकरणया जडान क्वचायेकाः परीक्षणया झ्वलय् दु, असार स्वयां न्ह्यः हे मत उत्पादन यायेगु आज्जु कथं ज्या जुयाच्वंगु दु ।
कुलेखानी तेस्रोया मू सुरुङया परीक्षण क्वचायाः लः जायेका तःगु दु, थ्व आयोजनाया महत्वपूर्ण माइलस्टोन खः ।
प्रसारण लाइनया स्वंगू मध्ये निगू टावर दयेकेगु ज्या क्वचायेधुंकूगु खँ आयोजना प्रमुख सुभाषकुमार मिश्रं कनादीगु दु । वय्कलं धयादी कथं विद्युत गृहया उपकरणया परीक्षण लिसें प्रसारण लाइनया ल्यं दुगु टावर दयेकाः थ्यमथ्यं ५ सय मिटर तार सालेगु ज्या क्वचायेत्यंगु दु । वय्धलं धयादीगु दु, ‘प्रसारण लाइनया कारणं मत उत्पादन प्रभावित जुइमखु ।’
मकवानपुरय् दयेकाच्वंगु आयोजनां कुलेखानी जलाशयया नियन्त्रित बहाव व खानी खोलाया थप लः छ्यलेगु खँ धाःगु दु । नेपाल सरकार व विद्युत प्राधिकरणया लगानीइ दयेकाच्वंगु थ्व आयोजनाया न्हापांगु लागत २ अर्ब ३३ करोड तका खः । आयोजना दयेकेगु अवधि अप्वयेवं आयोजनाया लागत ४ अर्ब ६३ करोड तका तू वंगु दु ।
वइगु वैशाख १७ गते निसें छगू युनिटं मत उत्पादन यायेगु कथं आयोजना व्यवस्थापन व ठकेदार कम्पनीं ज्या यानाच्वंगु दु । प्रसारण लाइनया ज्या नं लिपांगु चरणय् थ्यंगु खँ धाःगु दु । मेगु युनिटं असारं निसें उत्पादन शुरु जुइ ।
LEAVE YOUR COMMENTS