बागमति प्रदूषणय् सरकार व महानगर जिम्मेवार

ख्वप – बागमति खुसिइ प्रदूषित जुया वंगु खँय् सरकार व महानगर जिम्मेवार जूगु द्वपं थन जूगु छगू ज्याझ्वलय् सहभागितय्सं बिउगु दु । अधिकार सम्पन्न बागमति सभ्यता एकीकृत विकास समिति व चलचित्र निर्देशक समाजया मंकाः ग्वसालय् ‘संकिपाय् बागमति’ विषयय् जूगु अन्तरक्रिया ज्याझ्वलय् नवाःपिं वक्तातय्सं उगु द्वपं बिउगु खः ।

संकिपाकःमितय्सं छेँया छेँय् सेफ्टी ट्यांकीया व्यवस्था मदुगु नक्सयात नं पास यायेगु व सरकारं नं उकियात मिसखा तिसिनाः समर्थ याःगुलिं हे बागमतिइ प्रदूषण अप्वया वंगु द्वपं बिउगु दु ।

ज्याझ्वलय् चलचित्र विकास बोर्डया पुलांम्ह अध्यक्ष नापं वरिष्ठ चलचित्र निर्देशक यादव खरेलं अधिकार सम्पन्न बागमतिं शिक्षा व सूचना प्रवाह यायेगु ज्याय् माक्व बजेट खर्च मयाःगुलिं हे खुसिया स्वच्छता कायम जुइ मफुगु धासें खुसि सिथय् च्वंगु जग्गा मियाः नइपिं नापी ज्याकू व पशुपतिया थीथी गुथिया कर्मचारीतय् नं ल्हाः दुगु द्वपं बियादिल ।

अथे हे मेम्ह निर्देशक मोहन निरौलां नं बागमति प्रदूषित यायेगु ज्याय् दकलय् न्हापां सरकार व वयां लिपा नगरपालिका हे जिम्मेवार जूगु द्वपं बियादिल ।