‘एकताया कुतः विफल जुल’
येँ – नेकपा एमालेया अध्यक्ष केपी ओलीं पार्टीइ व्बलंगु समस्या ज्यंकेगु नितिं थःपिंसं यानागु फुक्कं कुतः असफल जूगु घोषणा यानादीगु दु । वय्कलं देय्, जनता व पार्टीया भलाईया नितिं बांलाःगु मनसायं यानागु फुक्कं कुतः माधव नेपाल व वया गिरोहं तिरस्कार व अपमान यासें अस्वीकार याःगुलिं एमालेय् ब्वलंगु समस्या ज्यंकेगु फुक्कं कुतः असफल जूगु खँ धयादीगु खः ।
नकतिनि क्वचाःगु एमाले केन्द्रीय कमिटीया बैठकया निर्णय कार्यान्वयन यायेत अन्तरपार्टी निर्देशन जारी यासें वय्कलं नेपाल पुचलं पार्टी तछ्यायेगु मनसायं हे थीथी गतिविधि यानाच्वंगु द्वपं नं बियातःगु दु ।
निर्देशनय् धयातःगु दु, ‘मानव नेपाल व वया गिरोहं देय्, जनता व पार्टीया भलाईया निंतिं बांलाःगु मनसायं यानागु फुक्कं कुतः अस्वीकार यात, थुकथं समस्या ज्यंकेगु झीगु कुतः असफल जुल ।’ उकथं हे निर्देशनय् नेपाल पुचलं खुलेआम गुटगत भेला याःगु, पार्टी तछ्यायेगु आज्जु कथं च्वंनिसें क्वय् थ्यंक समानान्तर कमिटी नीस्वंगु द्वपं नं बियातःगु दु । अथे हे उकी नेपाल पुचलं पार्टी अध्यक्ष व राष्ट्रपतिया पुत्ला च्याकूगु विषययात नं गम्भीर घटना कथं न्ह्यथनातःगु दु ।
निर्देशनय् धयातःगु दु, ‘माधव गुटं विपक्षीलिसे जानाः देय्न्यंकं सम्माननीय राष्ट्रपति, प्रधानमन्त्री लिसें पार्टी अध्यक्षया पुत्ला च्याकेगु, पार्टी व पार्टी नेतृत्व विरुद्ध, मखुगु, अभद्र व अमर्यादित प्रचार अभियान न्ह्याकेगु थेंज्याःगु आपराधिक ज्यात याना वयाच्वना ।’
पार्टी एकताया लागिं यानागु फुक्कं कुतः असफल जूगुलिं आः पार्टी अज्याःगु दुष्प्रयासपाखें हरेस मनसे न्ह्यःने न्ह्याः वनीगु खँ नं धयातःगु दु ।
एमाले तछ्यायेत अध्यादेश ?
एमालेया वरिष्ठ नेता माधव नेपाल पुचःयात एमाले तछ्यानाः न्हूगु पार्टी गठन याये जीक लँपु चायेकेगु लागिं सरकारं अध्यादेश मार्फत दल विभाजन सम्बन्धी कानून हयेत्यंगु खँ धाःगु दु ।
म्हिगः आकाझाकां प्रतिनिधिसभा व राष्ट्रिय सभाया अधिवेशन अन्त्य यानाःलि आः अध्यादेश मार्फत राजनीतिक दल सम्बन्धी कानून संशोधन यानाः अज्याःगु व्यवस्था यायेत्यंगु खँ सूत्रं धाःगु दु ।
दल विभाजन सम्बन्धी वर्तमान कानूनय् न्हूगु दल चायेकेगु खःसा संसदीय दल व केन्द्रीय कमिटीइ ४० प्रतिशत संख्या दयेमाःगु व्यवस्था दु । आः थ्व कानूनयात संशोधन यानाः ‘व’ या थासय् ‘वा’ तयेगु कुतः जुयाच्वंगु दु । नापं प्रतिशत संख्या नं ४० स्वयां कम यानाः २५ जक तये फुगु खँ नं सूत्रं धाःगु दु । यदि अथे जुल धाःसा माधव नेपाल पुचलं याउँक हे एमाले विभाजन यानाः न्हूगु पार्टी गठन याये फइ ।
थ्व संशोधनं माधव नेपाल जक मखु जसपाया दलविहिन जुयाच्वंम्ह नेता महन्थ ठाकुर पुचःयात नं न्हूगु पार्टी चायेकेत अःपुइगु खँ धाःगु दु ।
LEAVE YOUR COMMENTS