कोरोना संक्रमितया ल्याः हानं अप्वल

येँ (नेपालभाषा टाइम्स)- नेपालय् कारोना भाइरसया संक्रमण थहां वनेगु क्रम हानं निरन्तर अप्वया वनाच्वंगु दु । म्हिगः जक नेपालय् १४२ म्ह कोरोना भाइरस संक्रमण जूपिं लूगु दु । स्वास्थ्य तथा जनसंख्या मन्त्रालयया कथं १०७९ म्हेसिया नमुना परीक्षण याःबलय् १४२ म्ह संक्रमित लूगु खः ।

मन्त्रालयया कथं आरटी पीसीआर विधिं ३८१ व एन्टीजेन विधिं ६९८ म्हेसिया परीक्षण याःगुली १४२ म्ह संक्रमण लूगु खः । उकी मध्ये आरटी पीसीआर विधिं ४४ व एन्टीजेन विधिं ९८ म्ह संक्रमण पुष्टि जूगु मन्त्रालयं धाःगु दु । थौंकन्हय् देय्न्यंकं १६३ म्ह संक्रमित दुगु खँ नं मन्त्रालयं धाःगु दु ।

थ्वहे झ्वलय् विक्रम संवत्या न्हूदँ हनेत भारतं नेपाः लिहां वयाच्वंपिं नेपाःमितय्के कोरोना भाइरसया संक्रमण जुयाच्वंगु लूगु खँ नं सीदुगु दु । भारतय् नं थौंकन्हय्् न्हिथं कोरोना भाइरसया संक्रमितया ल्याः अप्वया वनाच्वंगु दु ।