हुलाक सेवा निःशुल्क यायेत काउन्सिलया इनाप

येँ – पे्रस काउन्सिल नेपालं पत्रपत्रिकायात हुलाक सेवा निःशुल्क यायेत इनाप याःगु दु । काउन्सिलं हुलाकपाखें पत्रपत्रिका छ्वयेगु व्यवस्थाया निंतिं आवश्यक समन्वय यायेत धासें उकथं हुला सेवा निःशुल्क यायेत इनाप याःगु खः ।

काउन्सिलं छगू विज्ञप्ती जारी यासें बिउगु जानकारीकथं पत्रपत्रिकायात हुलाकपाखें निःशुल्क व्यवस्थाया निंतिं आवश्यक समन्वय यायेत संचार व सूचना प्रविधि मन्त्रालय व हुलाक सेवा विभागयात उकथं इनाप याःगु खः ।

थ्व स्वयां न्ह्यः हुलाक सेवा विभाग व जिल्ला हुलाक ज्याकुथिइ दर्ता जूगु पत्रपत्रिकायात हुलाकपाखें निःशुल्क छ्वयेगु व्यवस्था दुगुलिइ उगु व्यवस्था अःखः पत्रपत्रिकां प्रत्येक प्रतिइ हुलाक टिकट अनिवार्य तिकेमाःगु व्यवस्था याःगुप्रति काउन्सिलं थःगु चिउताः व सरोकार क्यंगु खः ।

पत्रकार ख्यःपाखें नं थ्व विषययात कयाः काउन्सिलय् गुनासो वःगु धासें उकिया समन्वयया निंतिं मन्त्रालय व विभागयात लिखित रुपं जानकारी छ्वेगु ज्या जूगु काउन्सिलं न्ह्यथंगु दु ।

पत्रपत्रिकायात लानाच्वंगु थुकथंया समस्या समाधानया निंतिं आवश्यक सहजीकरण यायेत नं काउन्सिलं इनाप याःगु दु ।