ने. सं. ११४३ तछलाथ्व द्वादशी -

मचाया ज्यान बचे याःम्ह रियल स्पाइडर माय्न

हलिउड संकिपा ‘स्पाइगर माय्न’ ला यक्वसिनं स्वःगु दयेमाः । आपालं श्रृंखलाया उगु संकिपाय् स्पाइडर माय्नं अजू अजूचायापुगु चर्तिकला क्यनी । उगु संकिपाया नायकं म्हितूगु थेंज्याःगु हे भूमिका अज्याःगु हे शैलीइ छम्ह मनुखं नं निर्वाह याःगु दु । फ्रान्सय् छम्ह आप्रवासीं अज्याःगु शैलीं छम्ह प्यदँ जक दुम्ह मचायात उद्धार यानाः वयागु ज्यान बचे याःगु दु ।

पश्चिमी अफ्रिकी देशं फ्रान्सय् वयाच्वंम्ह उम्ह आप्रवासीं धाथें हे चमत्कारिक शैलीं पेरिसया छखा छेँया प्यंगूगु तल्लाय् पिने यग्गानाच्वंम्ह मचायात सकुशल उद्धार याःगु खः । मचाया अबु बजाः वनाच्वंगु इलय् छेँय् दुने म्हिताच्वंम्ह उम्ह मचा आकाझाकां बार्दलीइ झुन्डे जूवल ।

व हे इलय् लँय् वनाच्वंम्ह २२ दँ दुम्ह आप्रवासी ममोउदोउ गास्सामां स्पाइडर माय्नया शैलीं तत्काल छुं हे विचाः तकं मयासे फटाफट छगू लिपा मेगु छगू तल्लां मेगु तल्लाय् वनाः उम्ह मचाया उद्धार याःगु खः । खिपः वा अज्याःगु छुं सामग्री व सुरक्षाया बन्दोबस्त विना हे खाली ल्हातं छेँया पिनें हे याउँक मचा दुगु थासय् तक वंम्ह गास्सामायात अन मुनाच्वंपिं प्रत्यक्षदर्शीतय्सं नं हौसला बियाच्वंगु खः ।

जब गास्सामा प्यंगूगु तल्लाय् थ्यन वं छक्वलं मचायात ज्वनाः सुरक्षित रुपं पित हयाः उद्धार याःगु खः । गास्सामाया अदम्य साहस व क्षमतायात कयाः फ्रान्सय् व्यापक चर्चा जुयाच्वंगु दुसा अनया राष्ट्रपतिं नं वयात नाप लानाः वयागु ज्यायात कयाः प्रशंसा याःगु दु । लिसें थःगु ज्यानया वास्ता मयासे मचायात बचे याःम्ह गास्सामायात फ्रान्सया नागरिकता बीगु प्रक्रिया तकं शुरु जुइधुंकूगु दु ।

थःगु ज्यान तकं जोखिमय् तयाः मचा दुगु थासय् तक वनेत प्यंगू तल्ला गयेगु झ्वलय् वं मुक्कं ३० सेकेन्ड जक खर्च याःगु खः । सलंसः मनूया दथुइ नं गास्सामां उकथं छेँया प्यंगू तल्ला गयाः मचायात उद्धारया याःगु दृश्य सामाजिक संजालय् भाइरल जुयाच्वंगु दु । वयागु उकथंया साहसिक ज्या लिपा वयात स्पाइडर माय्नया संज्ञा बीगु नापं ‘रियल हिरो’या रुपय् ब्याख्या यायेगु ज्या जुयाच्वंगु दु ।