इन्डोनेशियाय् भुखाय् ब्वयां पीम्हं मल्याक मंत

एजेन्सी – इन्डोनेशियाया सुलावेसी द्वीपय् भुखाय् ब्वयाः पीम्हं मल्याक मनूत ज्यान वंगु खः । भुखाचं यानाः छगू अस्पताल लिसें तःखा छेँ दुनावःगु खँ स्थानीय अधिकारीतय्सं धाःगु दु। दुंगु छेँया भग्नावशेष चिइकाः मालेज्या न्ह्यानाच्वंगु दु । थ्व द्वीपय् शुक्रवाः छगू चिकिचाधंगु भुखाय् ब्वःगु खःसां थ्वयां घौछि लिपा हे ६.२ म्याग्निच्यूडया तःधंगु भुखाय् ब्वःगु खः । भुखाचय् लानाः सलंसः मनूत घाःपाः जूगु दुसा द्वलंद्वः मनूत विस्थापित जूगु खँ धाःगु दु ।

सुलावेसीया मामुजु नगरय् लाःगु अस्पतालया न्यातँजाःगु छेँय् दुनावःबलय् थुकी लानाः च्याम्ह सीगु खः । थ्व भवनं जक ६० म्हेसिया सुरक्षित उद्धार जूगु खः । भुखाचय् लानाः सीपिनि ल्याः अप्वयेफुगु खँ स्थानीय अधिकारीतय्सं धाःगु दु। भुखाचं यानाः मत मदुगु व फोनया लाइन नं मदुगुलिं उद्धारज्या प्रभावित जुयाच्वंगु दु  । शुक्रवाः ब्वःगु भुखाय् माजेने नगरं ६ किलोमिटर तापक  केन्द्रविन्दु लाःगु खःसा भुखाय् १० किलोमिटर क्वं न्ह्याःवंगु खँ धाःगु दु ।

भुखाय् लिपा आधिकारीक रुपं सुनामीया ख्याच्वः बिउगु मदु, तर द्वलंद्वः मनूत छेँ त्वःताः सुरक्षित थासय् च्वंवंगु दु। तर अधिकारीतय्सं तःधंगु भुखाय् ब्वःलिं लिभुखाय् ब्वयेफुगु व थुकिं सुनामी नं वयेफुगु खँ धयाच्वंगु दु। इन्डोनेशिया अप्वः थें भुखाय् ब्वयाच्वनीगु देय् खः । सन् २०१८ य्सु लावेसीइ ब्वःगु भुखाचय् लानाः निद्वलं मल्याक मनूतय् ज्यान वंगु खः । सन् २००४ य् इन्डोनेसियाय ९.१ म्याग्निट्युडया भुखाय् ब्वःगु खः गुकिं यानाः हिन्द महासागरय् सुनामी नं वःगु खः । सुनामीं यानाः झिंस्वंगू देय् या २ लाख २६ हजार मनूतय् ज्यान वंगु खःसा इन्डोनेशियाया आचे प्रान्तय् जक १ लाख ७० हजारया ज्यान वंगु खः ।

सम्बन्धित बुखँ

LEAVE YOUR COMMENTS