फेसबुकया कारणं जागिर चट्

फेसबुकय् मनूतय्सं किपा, कमेन्ट सेयर अर्थात पोष्ट यानाच्वंगु दइ । च्वयातःगु स्टाय्टस वा किपा थःत यल धाःसा यक्वसिनं उकियात सेयर यायेगु याः । थथे किपा वा स्टाय्टस सेयर यायेगु छुं तःधंगु गल्ती नं मखु । तर म्यानमारया छम्ह मिसाम्ह चिकित्सकं फेसबुकय् फोटो सेयर याःगु द्वपनय् हे जागिर हे चट् जूगु दु ।

म्यानमारया मेडिकल काउन्सिलं उम्ह मिसाम्ह चिकित्सकया लाइसेन्स हे रद्द याना बिउगु दु । मोडेल तकं जुयाच्वंम्ह उम्ह मिसाम्ह चिकित्सकं अनुचित प्रकारया वसः पुनाः कयातःगु किपा सामाजिक संजाल फेसबुकय् पोस्ट याःगु धासें वयागु चिकित्सकीय अनुमति हे खारेज याना बिउगु खः ।

मोडेललिसें पेशां चिकित्सक जुयाच्वंम्ह २८ दँ दुम्ह नाङ मवे साङ अप्वःथें फेसबुकय् ‘सेक्सी’ किपा पोष्ट यायेगु याना वयाच्वनीम्ह खः । तर थ्व वयागु निंतिं प्रत्युत्पादक जक मखु दुर्भाग्य नं जुयाबिल । काउन्सिलं लाइसेन्स रद्द यायेगु निर्णयया साङं विरोध यासें थःगु व्यक्तिगत स्वतन्त्रता हनन याःगु दावी तकं यागु दु ।

तर काउन्सिलं वं पुनातःगु वसः तसकं आपत्तिजनक जूगु व म्यानमारया संस्कृति विरुद्ध जूगु ठहर याःगु दु । काउन्सिलं साङयात आवंलिं अज्याःगु किपा पोष्ट मयायेत व पुलांगु किपा नं चिइकेत ख्याच्वः बिउगु खःसां उकियात बेवास्ता याःगु काउन्सिलया धापू दु ।

 

सम्बन्धित बुखँ

LEAVE YOUR COMMENTS